Бурдъёсын-а бурдъёстэк-а?

Куинетӥез, кинэ мон висъясал Удмурт Кылбурчи группаысь - Микаль Михайлов.

Та авторлэн туж сюлэме пырись кылбуръёсыз. Адӟыны луэ пуш дуннезэ воргоронлэсь, мар сярысь малпаське со. И ваньмыз та гожтэмын туж бай удмурт кылын.
Ку мылкыдын ӧвӧл, как раз солэсь кылбуръёссэ можно лыдӟыны, соос соку тонэ будто валало.
Лирической герой ӵемысь жадемын та улонлэсь, адямиослэсь. Малы меда? Может со трос адӟемын ини? Яке жадемын интылэсь но солы воштыны кулэ ваньзэ (но мар ке сое уг лэзьы кошкыны)? Син азе пуксе туж мур малпаськись воргорон, вераськисьтэм, серьезной ымнырын, кудӥз адӟе сое, мае уг адӟо мукетъёсыз.
Лирической герой юанъёс аслыз сётэ: малы улӥсько, мар понна? Мугор улэп, нош лул, сюлэм кулэмын ини (Сьӧд басмаен ни синучкон Сюлмез со нош ик шобыртэм)

#МикальМихайлов

Котьку кадь ыштыса, серем пыр тусбуйме

Дэри пыр лёгаське уж пала сюрес

Йырын утчамъяське выльысь та юанме:

Малы татчы вуттӥз вамыш та улонэз?

Пинал бурдъясь мылкыд валлян ини ортчиз

Лёгаськылӥз гань-гань тузон бугырскыса

Вань ужаны тыршон куарусёнэн кошкиз

Коньдон басьтон нунал усиз питырскыса

Нуналысен нунал, курыт сьӧд ымныръёс

Визьмо выллем тусын кутско вераськыны

Укно шорын куасьмем пичи кут виштыос

Тунсыкогес юртто луллы буйгатскыны

«Тон ук писпу ӧвӧл, бен вошты интыдэ»

Нош пель сьӧрам кылдо мур шокамен кылъёс

Та ар гинэ бон, мед, ортчоз – вошто гуэз

Капчи на вераны, Инмар кызьы гожтоз…

#МикальМихайлов

Сиськон инты но газ плита...
Ӵын вӧлме борддоретӥ,
Дыр мынэ ӵукна пала,
Калго синъёс укноетӥ.

Мон улӥсько? озьы но, бон
Тае ваньзэ Инмар сётэм...
Сьӧд басмаен ни синучкон
Сюлмез со нош ик шобыртэм

Вань сыӵе кылбуръёс, кытын лирической герой индылэ, кинэ ке "улыны дышетэ". Со индылонъёсысь адӟиськом кыӵе ке правилоосты, кудъёсызъя ачиз лирической герой улэ (луымтэез сярысь сюлмаськыны кулэ ӧвӧл, урод кылъёсты но кылыса йырдэ вылӥе ӝутыса улоно, сётӥськыны дырызлэсь вазь уг яра, секытлэсь шӧмзэ веръятэк, улонлэсь ческыт шӧмзэ уд веръя ). Шӧдӥське кылбуръёсъя - лирической герой егит на, нош малпанъёсыз, визьмыз мӧйы улонэз адӟем адямилэн кадь.

           #МикальМихайлов

«Малы малпаськиськод улон сярысь?

Дырдэ эн быдты тон сюлмаськыса

Нокин уг тод на мар луоз нырысь…»

Пушкысь куара вера, азьланьтыса:

«Нунал ай ӵуказе со, адӟытоз.

Тон ул шумпотыса, ӵабъяськытэк

Кема керӟегъяськид, таре тырмоз

Ас улондэ тон тод но, пукы тэк».

Сыӵе ваньмыз капчи ке луысал…

Пуш куаралы сёто на валэктон -

Дунне вылэ, тазьы, бон, валаса

Вакчи визьем ой вордӥськы, дыр, мон.

#МикальМихайлов

Тыршы тон котьку но ӝутскыны.

Лёгам лулэд валтэ ке улӥе,

Котькуд вамыш юрттоз азинскыны,

Костаськисез отчы ик со вые.

Мыным но шуг вал, мон бугыръяськи.

Улон сётъяз ке но ангес лыам.

Тӥязы ке но, нош пумитъяськи,

Вирсэр мертай ке но,мыжгай гадям.

Бон, котькудӥз аслыз сюрес шедьтэ.

Ачиз ортче но вань шӧмзэ вала.

Усьсал ке мон азьло ик улӥе,

Туж ичизэ но ӧй ортчысал дыр на.

Лыдӟиськод куд-ог кылбуръёссэ но шокан пась быре кадь. Ӝокаськод лирической героен ӵош. Котыр сомында кадь омыр, эрик, нош ӝутскемед уг луы. Апатия ваньмыз вылэ. Трос бугырэяськиськод ас пушкад, нош юанъёслы валэктонъёс уд шедьтӥськы.  Уг тырмы тулыс лирической геройлы. Тулыс, ку инкуазь воштӥськемен, ачид но воштӥськыны ӧдъяськод кадь. Вань мылкыдзэ герой аресэныз герӟа. Может арес янгыш? Хендрикс, Моррисон, Кобейн кема ӧз улэ, улонлэсь вань шуг-секытъёссэ, умойзэ йӧназ адӟыса но ӧз вуттэ дыр. А может наоборот, соин ик шумпотыса кошкизы.

#МикальМихайлов

Кынтӥсь лымы сулеп кельше мыным,

Зор шапыкъёс но ке вандо, кельшо.

Ӧс усьтэмын ке но, уг лу ӝутскын,

Мылкыдъёсы бурдъяськыса ышо.

Та выль вамыш,оскыто асме,

Сюбег шугъяськонам ик нош выё.

Мон сюй пушкын, шундые орсьме,

Пумит тӧллы азьло вал кынмисько.

#МикальМихайлов

Малы меда сьӧд тулкымен
Монэ нош ик шобыртэ?
Синэз пытса, кысэ пумен,
Изъянтыса кадь сэрпалтэ?

Шулдыр мылкыд, кытын-о тон?
Вай ни мыным тулыс шӧмез.
Котькуд нунал шузимытон,
Учкылӥсько ӵем вирсэрез.

Янгыш ӧвӧл меда арес,
Сьӧд уй пыдсы вуттӥз шуса.
Хендрикс, Моррисон, Кобейн
Кошкизы шумпотыса.

Берпуметӥ кылбуръёсаз лирической герой воштӥськемын. Малы? Солэн сюлмаз каръяське оскон. Адӟе пеймыт корка сигысь тӧдьы сэрегэз.  Васькем бераз аслыз ачиз лирической герой юан сётэ: малы гинэ тубай корка сиге? Тулысэз отысь адӟиз, нош васькыса, обратно огшоры улон ӧраз пыриз (улонзэ толалтэен сравнивать каре). Но табере укноосаз тулыс шуккиз, кыӵе ке воштӥськонъёс луозы мед-а? Кылбур быре туж оптимистично, шуод-а мар-а.

#МикальМихайлов

Уин корка сиге туби.

Сюриз кытысь ке но тубат.

Лымы пелля, адске ичи,

Пулъёс кыллё кечат-вамат.

Лымы ни шобыртэм ваньзэ,

Мон утчасько мае ке но.

Ялан бугыръясько вужзэ,

Сюлэм уг чида - утчано!

Тӧдьы сэрге синмы вае,

Югыт пиштэ со быдэсак.

Малы утчай меда тае?

Туби уин татчы пырак.

Берлань толалтэе чигнай.

Тулыс шуккиз укноосам.

Марлы отчы меда тубай?

Тӧдьы бурдъёс тыбыр сьӧрам.

Предпоследний кылбураз но воштӥськон адӟиське. Татын потэ выль образ - Толэзь ныл. Толэзь нылЫ, пе. Лирической геройлэн. Мар тодмо со ныл сярысь? Со пумиськем кинэн ке, синмаськем, нош собере вуэм дыр люкиськонлы. Вераны ас сюлэм висёнъёссэ вамыш ӧз лэсьты. Ӧжытак мистической ныл, эрико (липет вылтӥ ветлэ кышкатэк)  - в противоположность лирической геройлы.

#МикальМихайлов

Пеймыт лулъёс ветло сьӧд музъемтӥ,

Пурысь тӧлъёс ӝутско кӧбератэк.

Чик номырлэсь но юн ик кышкатэк,

Толэзь нылы ветлэ липет вылтӥ.

Солэн туннэ берпуметӥ уез,

Люкиськонэн дунне герӟаськемын.

Кылиз улон толон пумиськонын

Трос люкетлы пазяськылӥз сюлмез.

Тодаз лыкто кужмо кион синъёс,

Бералтӥзы солэсь пинал лулзэ.

Вань кужымзэ бичаз но вамышсэ

Ӧз лэсьты...одно...сое витёз...

Та кылбур берпуметӥез "Удмурт Кылбурчи" группаын. Туж тунсыко учкыны, кызьы лирической геройлэн воштӥське улонэз.

Микаль Михайловлэн потэм ини кылбур бичетэз (кылем арын Куарагурын вормем понназ кадь). Тани скоро луоз презентациез. Лыдӟем потэ ини).

Кылбуръёс басьтэмын Удмурт Кылбурчи группаысь.