Не ӟуч кар

Туннэ ӵукна вуим Москвае. Мыным та город уг кельшы малы ке. Одӥг пол но ӧй вал ке но татын.
Вуимы вокзалэ. Казанскоисьтыз кошконо. Милям вань 5 часмы. "Ойдо, - шуисько,- хоть Красной площадез учком-а мар-а".
Метрое пуксим. Сыӵе арсыз.. Сомында адямиез, вуж метро, пеймыт, кырсь, адямиос дыртто, донгыса лэзё. Петыркарын дас поллы умойгес: адямиез нокытчы уг дыртты,  чылкыт метро, югыт...
Метроысь потыкумы Поздейкинлэн синыз усиз ялон шоры. Бурановской песяйёс, пе, Кремльын кырӟалозы. Осто, шуса кошким.
Вуимы. Син нырысь ик усиз, конечно, борддорез шоры. Ӝужыт. Дышемын кадь учкыны киноосысь, газетъёсысь. Кыӵе ке дас пол лёгам тема. Нош ачид, ас синмыныд учкиськод ке, сюлэм шурдэ.
Собере площадяз кожим. Син нырысь ик усиз баааааадӟым сандык шоры:-) Одӥг пал сэрегзэ кесяны кутско ини вал. И кызьы сое отчы пуктӥллям? Со же туж, зэм но, мар ке быдӟа. Неужто пуктыкузы нокин ӧз дугдыты? Трос ик кинке кинлы ке уксё куштӥз та понна, наверно. Туж курутой реклама. Оломаре но адӟод вылэм..

Мукет палаз "тол городок" пукто, конькиен нискылан инты лэсьто. Котыр ужасьёс. Трос бадӟым машинаос. Кыӵе ке хаос.  Кот, противной лымы усе, тӧло. Кузьыли кар. Котыр адӟисько совсем не ӟуч ымныро адямиосты.
И кыӵе шузиез мынэ Москвае улыны, а тем более уж утчаны? Ул шыпытак ас дорад но ужа. Мар соослэн ужамзы? Лымы тазато. Трос басьто ини, дыр. Улон интызэс малпам ик уг поты кадь. Огез тӥни, изе вал урамын. Пуны кадь.

Вокзалын но. Дунтэм противной одеколон зынъёс сураськемын эгыр, поезд, пӧсям зынъёсын. Кыӵе но ымныр ӧвӧл.. Тросэз нош ик ӟучтэм. Бадӟым сумкаосын. И ведь лыкты та кеме уж утчаны. Милям поездмы мынэ Нюренгри каре. Якутиысь -а мар-а кар. 5 нунал, пе, мынэ. Тросэз Москваысь ужаса берто. Мыным йӧтэ, азьтэм адямиос гинэ мыно Москвае уж утчаны. Мылыд ке потӥз, дорад но шедьтод мар карыны. Как раз лыдӟисько "Русский репортёрез". Гожъямын, кызьы куашкась гуртаз но воргорон уксё поттыны быгатэ.

Трос армиысь бертӥсьёс. Пиналэсь на. Малпаськод, нош соос мар карозы бертыса? Тожо уж ӧвӧл шуозы. Мынам однокласснике кошкиз армия бере Сахалинэ ужаны. Уж ӧвӧл шуса. Ярам, не Москвае.

Сыӵе ик Москва кылёз малпанам. Зынмем, кырсь, не ӟуч кар.

http://vk.com/al_bertina?w=wall-60114472_1656

Тютюка

Туннэ бертон сюресэ потӥсько.
Дырмес ортчытӥськом Светалэн ужаз. Киям книга кутӥ. М.Г. Атаманов "Удмурт нимбугор". Кыӵе но нимъёс ӧвӧл. Серем но потэ кадь. Шуом, Орех, Тютюка, Чибинь.. Мда.. Оломар но. Мар шуыса сыӵе ним тырод? Кыӵе ке арберилы кадь. Син медаз усьы шуса? Тросэз тюрк. пометаен, значениоссы оломар кадесь. Чебер кылӥське шуса тыро вал, дыр. Кыллэсь пуштроссэ тодытэк. Света шуэ:"Азьло сомында нылпиоссы вал, что уг ик малпасько вал, дыр, кыӵе нимлэн пуштросэз". Сюлэмшугъяське кызьы, пе, кыкетӥезлы ним пононо. "Нырысетӥезлы туж удачно ним шедьтӥм. Юбер удмурт но француз кылъёсын вань".

Удмурт нимъёслы гурт адямиос дышемын. Азьло выжы нимъёссыя верасько. Коньы Люба, Куака Петя,  Ӟемай,  Аськей, Гондыр, Ӝакы... Бускельёсмы пичи пизылы Марк ним понӥллям. "О,-шуисько,-непривычно мар ке.." Песяй:"Вашкала ним понӥллям".
Куддыръя паймиськод кадь, кызьы ним адямиез быгатэ возьматыны. Мынам атай Юрий - земледелец, пе. Пинал дырысеныз тракторен ужа ини. Гыре, ю нянь кизе.
Туж тунсыко потэ учкылыны нимъёслэсь пуштросъёссэз. Ним адями сярысь троссэ быгатэ вераны.

Мынам

Туннэ поръямы Хельсинкитӥ.
Нырысь пыраме Кастрен нимо обществое. Уг тодӥськы кызьы шуыны.:-) Мар ке вылез луоз. Возьмалэ:-) Мыным потэ оломар но вылез луоз, м.к.ш. Поздейкин потаз Удмуртия сьӧры. Солэн сомында малпанъёсыз.. Ну, ярам, уг ни ваньзэ вера.
Эшшо пырам на университетысь столовое. Былин. Мынам со бере уг ни пот пыраме асьме университет столовое. Мар сиемед потэ - сииськод и сомында, кудмында потэ. Ваньмыз понна одӥг дун. Студентъёслы 2 евро.  асьсэос ик утялто тусьты-пуньызэс. Соос, пе, котькуд ар тыро 60-а мар-а евро членской взнос. Собере олокыӵе но льготаос. Умой. Туж.

Толон мыным потӥз, что Хельсинки паськатӥсь,  сюбег кар. Туннэ мон валай - со сыӵе чик но ӧвӧл. Туннэ ветлӥм набережнойтӥ. Кыӵе татын чебер но котыр эрик, марке мында омыр но ву. Шокан пась ик быре.  Таллинлэсь но зол кельшиз мыным туннэ Хельсинки. Зарезь шоры дугдылытэк учконо кадь. Син уг жадьы.
Татын кыӵе ке адямиосыз мукет. Мукет дӥсясько, мукет асьсэды возё. Коркаоссы но мукет. Трос омырез, бадӟым пространствоез. Синмаськымон.
Тазьы ветлыса эшшо но эшшо мылкыд куашка ас шаер понна.

Хельсинкиын

Вуимы. Сюбег урамъёс. Паськасько кадь. Финляндия кельше йӧнтэм дышетӥсьлы. Ма, озьы ик малпасько вал. Мон дыши эстон но фин кылэз "отличать". Финъёс "йо"шуо, нош эстонъёс "йа" :-) Эстон кыл мусогес потӥз. Кырӟаса кадь соос верасько.

Мынӥмы Света Едыгаровалэн ужаз. Филологъёслэн карзы:-) Кузьмаз француз-удмурт кылбугор.
Света оломар но вераське:-)
Адӟи тушо пиосмуртъёсыз. Со, пе, студентъёс:
"Финъёс кузь йырсиё, кузь тушо. Малыке шуоно, татын дуно ӵышкиськыны. Мон вет9лӥсько Эстоние ӵышкиськыны. Симо кытысь ке Саранскысь ӵышкиськыса вуэ." Секыт финъёслэн улонзы:-)  Юыны но Таллинэ ветло. Алкотуризм:-)

Сиськыку опять потӥз блог сярысь вераськон. Мон блог гожъяны кутскыкум уг малпаськы вал, что со сыӵе "тодмо" луоз. Что со понна сыӵе вераськонъёс потозы. 

Хельсинкие

Пукисько паромын.  4 этажъем вал кадь. Вож. Чебер. Таллинысь Хельсинкие. Нырысьсэ собыдӟа вуэ потӥсько. Котыр зарезь.

Толон нырысьсэ адӟи зарезез. Сыӵе со бадӟым, сайкыт, кужмо, сьӧраз кыскись.

Нади возьматӥз вуж карез. Со ваньзэ-ваньзэ тодэ Таллин сярысь. Туж умой гид. Таӵеен ик аслым Европаез син азям пуктӥсько вал. Вуж, горд липето. Олокыӵе но мусо кафеосы пырамы. Малы Ижын сыӵеесь ик ӧвӧл мед-а?

24 этажъем гостиница йылэ тубаса учким Таллин шоры. Шокан пась ик быре кадь адӟыса кыӵе татын чебер.

Таллин

Туннэ кошкимы Выруысь.

Быдэс сюрессэ Едыгарова Светаен вераськыса мынӥмы. Со вераз, кызьы французъёс будэто нылпиоссэс. Пичи дырысенызы соос, пе, сисько ини вилкаен но пуртэн (аха, милямъёс 18 аресазы гинэ дышо ай, яке вообще озьы уг сисько), гадь вылаз сиёнзэ уськытэ  ке - парсь, эшшо не дай бог маин ке мед наштаськоз - улон быроз. Туж недемократичной воспитанизы. Монъя - пичиос наштаськыса, мае ке сӧрылыса  улонэз тодо.

...Таллин пумитаз кудӟем финъёсын,  кудъёсыз пароме мыно вал (татчы, пе,  соос ӵем вуыло юыны. Таллинын дунтэмгес, пе, ваньмыз. Соин часта гинэ татчы вуо Хельсинкиысь. Серем потӥз мар ке. Тодэ ваи атайлэсь пичи дырзэ верамез сярысь. Анайёс, пе, ветло вал бигере октӥськыны. Отын, пе, товар но вал, дунтэм но вал. Мон, пе, сьӧразы весь калъяськисько вал. Одӥг пол дэрем сэрегме бадӟым из улэ паськатыса кельтӥзы, мон медам мыны шуса).
Пумитаз Муш Нади.  Мон сое фотоосысь адӟи ни вал. Первой малпанэ: властелин колецысь кыӵе ке персонажлы кельше. Мусо горд пештырес, бабылес йырси, ачиз лапег. Зэм но маиз ке мушлы но кельше:-)

Нуиз дораз. Ох! Точно хоббитлэн кадь корка улосэз:-)  Выжыкылын кадь, зэмзэ но:-) Ваньмыз пулэсь, гурен эстӥське, мар ке мында книгаос.

Сиськыса кошкимы уй Таллинэз адӟыны.
Нырысь пыримы "Валли"(нылкышно ним)  баре. Туж тодмо бар. Нади шуэ:"Одно юоно милли малликас. Ато тон сое ке ӧд юы значит Валлие ӧд но пыра". Мон ӧй но юа марлэсь со, кыӵе со. Адӟи горд мар ке. Йырын чилектэм кадь: точно перец. Юи. Ым пушкын ӝуа. Юасько. Нади мыняса шуэ:"Чили перецен". Вань на отын пересь вышибала. Таза. Корстен нимыз. Труба, пе, асьме сяин. Куке но трубочист луыса ужам (ма али но со уж вань на). Со вообще кыӵе ке сказочник. Оломар но вераса пуке. Амазонкаос, пе, куке но татчы вуылӥллям, соин татын матриархат.
Мыным вераз 6 кылэз тодӥсько шуса.
Собере вӧзам кыӵе ке пиосмурт лыктӥз. "Мон,-шуисько,-удмурт. Тонэ уг валаськы". "О, -шуэ,-угри -мугри". Сыӵе мусо йӧтӥз верамез. Соос, пе, озьы шуо финно-угръёсыз. Но асьсэзыс, эстонецъёсыз, озьы уг шуо. Собере потӥм ураме мукет баре потыны. Со пиосмурт сьӧрам бызьыса потӥз но мырдэм но кызьы ӟуч сямен вера:"Ты, я. Эстонцы, саамы,  удмурты и другие... мы ведь одна семья.." Собере юн ӟыгыртӥз. Поздейкинэн Надя серекъяса сыло.

Мынӥм Кики клубе. Ноку ӧй малпа вал, что экто 80-тӥ аръёслэн гуръёсыныз.

Суббота. Трос юэмъёс. Кудӟем Таллин. Урамъёсын уй улон кутскемын. Вуж урамъёсын. Тодэ лыктӥз гужем Кузонэ ветлэме. Вуж урамазы тожо ваньзы люкасько но отын уй улон кутске.

Жуммем йыр

То ли быдэс нуналъёсын семинарын пукыса, то ли мар.. йыр каждой ӝыт висе. Быдэс нунал пукиськод но кылзиськод тодмотэм вераськемез. Ярам берыктӥсьёс вань. Алама, что мон удмуртэз но ӟучез гинэ тодӥсько. Мынам сыӵе вераськеме потэ кудъёсыныз но соосыныз, нош соос ӟучез уг валало. Эх, а валасько, что соослэн но вераськемзы потэ. Уг луы. Сыӵе беспомощность.
Мон вообще паймисько со адямиослы, кудъёсыз трос кылын вераськыны быгато. Мынам чиданэ уг тырмы дышетыны. Азьтэме ачим быдӟа. Дышетысал ке, мон али тодысал ини немец, француз но польской кылъёсты. Кыӵе ке неудачница. Со монэ куддыръя туж йырвисьытэ. Ачим асме неудачница карисько. Донгыс.
Мон синмаськыса учкисько соос шоры кин вераське олокыӵе но кылын.

Эшшо йыры берло дыре висьылэ, наверно, солэсь, что мон валасько- мыным уг тырмы духовной сиён берло дыре.

А эшшо висе со понна, что трос кулэтэм сярысь малпаськисько. 

Эшшо со понна, что эшъёсылэн вордӥськем нуналазы ветлэме ӧз луы. Ваньзы, вераськем кадь, вордӥськемын шуркынмонэ. Таня но, Инна но, Наташа но, Яна но. Ваньзэ проворонила кадь йӧтӥсько. И малы ке сыӵе дыръёсы асме виноватэ кельтӥсько.

А эшшо визьтэммымон мӧзмисько пичи Ильяелэсь.

Эшшо одӥг нунал

Туннэ семинарын быдэс нунал пукиськом. Вис лэсьтӥмы - Выруе вербатим учкыны ветлӥм. Сетоос сярысь. И, вообще, сыӵе проблема сярысь, ку выльдӥськонъёс (модернизация) влиять каре традиция вылэ. Вербатим копак вал сето кылын. Нокин ми пӧлысь уг вала та кылэз. Учкиськом мар даурто сцена вылын но пичи комментариос вылэ. Синкыли поттӥсь, сюлэмэ пыӵась. Кылъёсын уд валэкты. Адӟоно сое. Шудӥсьёсыз обычной нылъёс. Тросэз импровизация вылын шудэмын. "Как продать сето " нимаське. Шедьтӥды ке учке однозэ но.

Туннэ Поздейкин зулиз. Удмурт культура сярысь. Тани мар веранъёс вал со бере:

"Удмурты среди финно -угров являются провокаторами. "
"У вас очень развит удмуртский язык в интернете. Удмуртскоязычный интернет радует."
" У вас самодеятельность среди молодёжи развита (Чудья промо сярысь), а у манси больше государственных праздников,  нежели самодеятельности."
"Вы ищете новые варианты. Я за." (Бобья Уча контемпо ласянь)
"Бурановские бабушки тоже провокация."

С.Едыгарова-Мантель (туж довольной ымнырын):"Удмурт культура цветёт и пахнет". Со вообще туж довольной пукиз.  Туж сак ваньзэ кылзиз но тупатъяз,  мар ке аслэсьтыз вералляз Поздеевлэн верамез вӧзы.

Вот. А асьмеос весь недовольноесь маин ке. Весь шуиськом, что номырлы ум яраське. Нош татын семинарын пукисьёс паймизы туж мае ми возьматӥм (Брангурт песяйёс, мадмуазель удмурт, Богдан, Белослудцев, СВГ, Камали, Чудья промо, удмурт вандализм, удмурт дискотекаос, Элькуновидение...)

Ну, наверно,  озьы ик кулэ. Довольноесь луимы ке, номыр выльзэ ум малпаллялэ.

Фин нунал.

Туннэ финъёс вуизы. Пуксимы ваньмы ӝӧк сьӧры сиськыны.
Ваньзы фин сямен верасько. Нош ми куинь кузя пукиськом, номыре ум валаське, сиёнмес кушаськом.
Семинарын суро-пожо верасько. Туж тунсыко но аспӧртэм семинар. Нокин нокытчы уг дыртты.

Ӵукна ветлӥмы Выру каре.  Пичи кар. Огшоры асьмелэн провинциальной каръёсмы кадь. Чебер коркаос вӧзын кесяськем, сисьмем коркаос. Но туж мусоесь адӟисько.
Куанергес кадь. Особо номыр шоры учконэз. Просто ветлӥськод, учкиськод кыӵе котыр чылкыт, эркыт, ӧжыт адями.
Тодӥ мар со "аросса" (ми улӥськом Аросса Виллаын. Мумы дор выллем мар ке. Туж кезьыт.). "Аро"-со нюр инты. Нош "са"- со азбар, котыртэм инты. Татын зэм но номыр уг буды. Нош уин ветло кырпарсьёс и музъемез бугыръяло.  Гыремын кадь будто бы.

Семинарын туж кельшиз нылкышнолэн докладэз. Кылэз, традициез мугорен валан. Со нылкышно театрен выре. Со вера: "Мукет традициен адями, мукет традициез возьматыны уз быгаты сцена вылын". Вань, пе, языковое чутьё. Мугор, пе, ачиз вала мар карыны, ку тон аслэсьтыд традицидэ возьматӥськод, шуом,  сцена вылын. Мон со нылкышноен соглаш. Зэм но. Ку ӟучъёс возьмато удмуртъёслэсь сямъёссэс, соос чылкак мукет сяин возьмато. Нош али дырлы ачиз калык но алдаса возьматэ аслэсьтыз сямъёссэ(тодэ лыктӥзы Айкай но Италмас). Со туж алама.

Номыр

Нулдӥ, валамон ини кине, Эрмитаже. Ветлӥз, ветлӥз но шуэ:"Ущербно себя чувствую. Еще раз аслым утвердил, что удмуртское наследие нищее".
Казанской собор азьын сылэ:"Какой нах ** Байгурезь? Какой Байгурезь? Вот на что надо смотреть. Рукотворное намного впечатляет".

Ӝыт туала удмурт культуралэн ӧраз пыртыны моктӥським ӟучомем удмурт эшсэ Поздейкинлэсь.
Со тодэ Любовь Быковаез гинэ. Ну,пе, эшшо Ганьков а мар-а. Возьматӥз на Ӵушъяловалэсь но Загребинлэсь клипъёссэ.
Нырысь верамы Белослудцев сярысь. Ӧз кельшы. Мон, пе, пересь ини сое кылзыны.
Собере возьматӥм Богданэз-Мурӝолэз. Нууу, шуэ, маиз ке вань. Быгатэ кадь. Тунсыко.
Эркишевлэсь "Ой, тӥ чебер нылъёссэ " гинэ кылэмез вань. Возьматӥм мукет кырӟанъёссэ. Кельшиз. Ну валамон ини малы.
Берло тодамы лыктӥзы Тимерханова, Анисимов, Котельников. Ну, тожо, валамон ваньмыз.
Сыӵе малпан потӥз, что удмурт культураез только сыӵе кырӟанъёсын быгато переваривать.

Выру

Туж кема мынӥмы автобусэн Эстоние улон интыямы. Али 2 час уин. Эстониын 12 час уин. Улон интымы - классической европейской гостиница выллем мар ке, кудӥзлэн кузёез пересь ини. Каминэн, огин сиськон ӝӧк, куинь этаж.

Поздейкинэн милемыз одӥг комнатае донгизы. Пара, пе. Сӥть ӧвӧл-а? Кин ке кресло вылын изёз кык нунал. Недаром кык шобрет понӥллям. Сотэк но оломар ӟургозы ини... Ох.

Лыктӥмы Тарту пыр. Ӝыт ке но вал ини, город кельшиз. Куанык кадь. Чебер. Мон валай мар мыным акыльтэ Ижкарын. Реклама. Котькытын реклама. Нош татын со туж ӧжыт. Чылкыт котыр. Пичиесь, мусоесь коркаос. Суредын кадь:) Улысал.

Жадемын, коскамын. Изёно.

"Куалектэм синъёс. Маленький удмурт в большом мире."(с)

Поездын Поздеев тодӥз,  что мон 2 пол вал ни Петыркарын:
-Ну и чем так крут Петербург?
-Ну кызьы тыныд вералод? Трос курутой событиос татын ортчизы. Писательёс та кар сярысь гожъязы, соослэн геройёссы ветлӥзы (асьсэос но) именно Питерлэн урамъёстӥз. Ваньзэ сое малпаса оломар луиськод кадь, что вообще, соос адӟылӥзы сое, маре тон но адӟиськод (коркаос, дворецъёс, площадьёс, выжъёс...) Вот..
-ммм..
Потӥськом Московской вокзалысь.
-Ооо.. А это Питер да? Тут сам Достоевский ходил, да? Мм.. Круто ведь.
Пыримы метрое. Васькиськом эскалаторен.
-А это мы сейчас под Невой? великой рекой, да?
Станция Маяковского.
-Ммм.. Футуристично..
Синъёсме ас поннам питыртӥ..
Мынӥськом урамтӥ. Пеймыт ай.
-А чо не светает -то?
Мон шораз шузи шоры кадь учки.
-А. Ну я помню про полярные ночи. То,что тут север.
Опять озьы учки.
-Дак хул*, я из Дебёс. Мне можно.
Ӧжыт шыпыт мынэмез бере:
-Так-то тут красивые зданияяя. Ващее..

Виза лэсьтон ласянь 10 пол но консульствое ветлӥм кадь.
-Ну... Не психуууй.. Лучше наслаждайся тем, что гуляешь. Смотри какие красивые здания.
Тышкаме потӥз. Киос ик лыдыны кутскизы кадь.

Нуналлэн пумаз истерика лэсьтӥз. Пока багажной отделение обедысь ӧз поты, малпамы магазинэ пыраны. Учкисько дӥсь, нош со мукет палаз, кыкетӥ этажаз. Адями мар ке ышиз. Малпасько, наверно, дӥсь мертта. 20 мин. пала ортчиз ини. Ӧвӧл. И вдруг... Короткометражка: Поздейкин вӧзтӥ тӧлпери кадь кошкиз паськыт вамышъяса, пакетэныз чуть ли не йыр вадесозяз шонаса, ымнырыз туууууж недовольной. Сьӧраз потӥ. Сылэ:пӧсямын, йырсиез туркаськемын, судорожно тамаксэ пурккатэ. Мар луиз шуыса юасько.
-Дак чо кинула -то меня??? У меня телефон упал между эскалаторами. Я 20 мин. пытался достать его. А ты даже не пришла помочь!
Мон кулӥ. Быдэс сюрессэ серекъяса кӧт шугмиз.  Али но гожъясько, серекъясько.

Актёръёс но кулэ ӧвӧл.

P.s. Поздеев лыдӟиз блогез но шуэ:"Люди не знают с какой интонацией я это говорил. Со стороны это похоже на лепет.. . Мар.."
Мон:"Дебила, оветь?"

Поездын

Ох, и мӧзмыт поездын ветлыны серьёзной адямиосын. Не то что ми быдэс вагонэн экскурсие ветлӥськом вал. Отын дыр но шаплы ортче кадь шудыса да мар да. Нош таяз быдэс вагон буш вал Нижний Новгородось. Шыпыт, мӧзмыт. Сиськисько, изисько, лыдӟиськисько. И наоборот.

Али кык кузя мынӥськом. Ну как кык. Вань эшшо одӥгез, кудӥз милемын Ижкарысен мынэ ини. Горд. Удмурт. Кукморысь. Вераськись но кадь:
"Ох,  мыноно вылэм самолётэн. Отын 3 час гинэ Питерозь."
Собере потэм бераз Поздеев:
"Кельше, что удмуртъёс пӧлын но мажорикъёс вань."
Мон кулӥ...)

Фотое пуктӥ:

"Тон мыным али Бикузина напоминаешь. Вераськыса сылӥськом ке шыпытак телефонзэ поттоз но фотое пуктылоз " .

Так-то со оломар но вера. Серьёзной ымнырын мар ке серемзэ , нош мон верамез бере пырсекъяны. кутскисько.
Али мыным уг яра вераны кытчы, малы мынӥськомы. И мар ласянь татын мон при делах. Если ваньмыз ке пӧрмиз, тододы яратоно Юмшанысьтыды. Кызьы Богдан шуиз:
"Как же теперь? Это сколько получается жить без юмшановских новостей? Умру ведь))."

Оломар но...

Ну мар. Пепелац

Нылъёс таш-таш каблукъёсынызы корккетыса тубо -васько. Синъёссы учко одӥг точка шоры. Юэмын,долкамын. Ямсызэсь. Пӧсямын.
Туалет трос мать каро. Удмурт сямен.
-Бл*, тон монэ чуть мыжгыса ӧд лэзьы. Пиз*** татысь!!!
-Ой, бл*... Мон сыӵе кудӟи ини...Номыр карем уг поты.
Собере кыӵе ке Светалэсь "лыоссэ миськизы" туж кема.
Кин шуиз,что удмурт нылъёс вӧзтэмесь? Пепелацэ мынэ. Адӟоды кыӵеесь.

А пиос. Кызьы нылъёс вылэ уг тэтчо. Тулыс но ӧвӧл кадь.. Оло сӥзьыл понна витаминзы уг тырмы а... Кин тодэ ини?

...мон уг вера ни Мурӝол Андеграунд сярысь, Чипчирганъёс сярысь... Соос быгато. Сыӵе быгато, что юзыр-кезьыт луыса кошкиськод шоразы учкыса. Сыӵе соос мусоесь. Вань кырсез пӧлысь висъяськисесь...микрофонъёс гинэ только мар ке алама ужазы (алама ужась микрофонъёс Поздеевлэн уйвӧтаз пыро, дыр, ини. Элькуновидениын но мар ке туж алама ужазы)
Эшшо одӥг учкон. Адями зэмзэ но тордыны но эктыны лыктэ. Богдан кырӟан азяз лыдӟиз кылбурзэ. Берын сылӥсь пияш:"Мар ху*** та?" Берло то тодӥ со удмурт факультетын дышетске шуса. Сыӵеесь ини. Мар карод на?
Тросэз туж паймемын вал кызьы удмурт эктонэз эктӥзы нылъёс сцена вылын. Ӟечокъёс.

...эшшо мон ӧй но малпасал, что мынэсьтым блогме лыдӟе Москвин. Пайми. Ну может пӧяз. Чеберъяськиз ӧжытак азям озьы:-) ...

Ку уж трос ваньзэ огвакытлы вуттыны турттӥсько кадь. Кыкетӥ арнязэ шузимисько ни кадь. Дышетскон, дышетскон но эшшо огпол дышетскон. Эшшо на "Огни большого вуза" ортчоз 20-тӥ числоосы университетын. Куинетӥ арзэ "декоратор",пе,  мон.
Туж бадӟым уж лэсьтӥсько. Бааааааадӟым басма вылэ комиксъёс суредамъяськисько. Срисовываю точнее. Мукет сямен уг быгатӥськы. 6 на 8 метр. Кӧшкемыт. Мар ке мында суредано. Дыр но уг тырмы мукетэзлы.
20 числае лыктэ актовой залэ УдГУ -э. Адӟоды мар пӧрмиз. :-)

Зар-зар

Опять татчы вуылӥмы. Ибырвесь понна. Волшебноесь арбериос. Адямиез, мыным потэ, тросгес но тросгес луэ. Ньылетӥзэ ветлӥсьо ини татчы учкыны мар вилез вань.

Дарали: "Ой. Туала егитъёс курутоесь. А кытын тӥ дӥсяськиськоды? Полина Кубиста дорын.(противной весчи куараен) А кытысь тӥ аксессуаръёс октӥськоды? 312bags-лэсь но ибырвесьёс.(противной весчи куараен) Мимимим."

Ми понна ваньзэ вераз. Аха.

Урамтӥ бертӥсько. Огнам. Марайко кошкиз поръяны Славчиеныз. Киям букет сэзъяса (туннэ потон азям одӥг классын дышетскись ныллэсь учки контактысь туспуктэмзэ. Отын со пуксем трос тӧдьы розаосын. Туж чебер шуыса малы ке учки. Шумпотэмын, мыня. Нош ӝыт кытысь-марысь мыным кузьмазы... тӧдьы розаос. Паймоно кадь. Со адямилэсь, кудӥзлэсь уг ик возьмаськы вал).

Азям мыно кыӵе ке пиен ныл урам трос череъяса. Ныл кудӟемын, нош туганэз со вылэ куаш поттэ. Ныл:"Пью, пила и буду пить!!!" Ачиз зар-зар бӧрдэ но яратӥсько шуэ, эн кошкы шуэ. Сыӵе кӧшкемыт но ямсыз со кылӥське. Кыӵе солэсь анай луоз мед-а?

Тросэз ӝыт пуныоссэс поръяны потто:) Азям лыктэ бадӟым, лымы комок кадь тӧдьы, пуны. Мар ке кадь пуштрес. Синмаськыса ик кошки кадь ява. Ачим со пудо-животъёсты уг ке но яратӥськы. Милям шуо:"Ныл ке уг яраты коӵышез, картэзлэн анаеныз уз тупа". Ма мар карод инь табере? Уг яратӥськы :)

Кыӵе ке валантэм нунал. Сӥзьыл нунал.

P.S. Достоевский туннэ мукет ласянь усьтӥськиз мон понна.

Учке ай

Учке ай.  Кыӵе соос непосредственноесь. Кыӵе соос "кӧшкемыт чебересь". Учкыса ӟаӟег ку луиськод кадь.

Малпаны ик секыт кадь кызьы соос уло. Дышемын ини каньыл улонлы. Ки улын ваньмыз.

Фотоос шоры учкыса, шумпотӥськод. Вань на калыкъёс, кудъёсыз самобытноесь. Кудъёсыз цивилизациен быдтэмын, саптамын ӧвӧл на. Сыӵе калыкъёс ик уг быро. Соос уло асьсэ улонэнызы, оско асьсэ Инмарзылы.
Соос ворсаськемын асьсэлэн культураязы.

Асьмелы но, может быть, озьы ик кулэ.

Пеймыт Азамат

Мынӥсько Иже. Гань-гань. Машинаен. Машина тыр кырӟан. Кельшисьтэм но всё же. Яроз ини.

Не то что кызьы бертӥ дорам. Приключениосын. Поездэн.

Ӝыт. Аслам шузи куеным Азамат гуртэ потӥ. Ку потыны кулэ вал следующий станцие. Отын пумиськыны вераським вал ӵужмуртэн. Мон уг вера ини малы монэн озьы луиз. Шузи. Потӥ. И мар? Огшоры ситуация: сеть ӧвӧл. Звонить кареме уг луы. Васькисько станция дорысь гуртэ. Дэригес. Нош мон замшевой пыдкутчанэн... Машинаос дортӥ каллен кошко. Курдыт. Сюлэм йӧгаське. Телефон пуксёз ини тани-тани. Жингыртӥсько нош ӵужмурт уг куты трубказэ. Малпасько:"Бон кытчы пыром ини. Телефонлэн зарядкаез пуксиз ке вообще быриськиз. Кык пол та гуртэ вуылэме вань дуно эше доры. И вообще паймозы, дыр отчы ке пыри. Муважиозь 25 км пала. Пыдын мыныса шузи кылёд. Бон мынод ини. 3 гурт пыр потоно уг ай. Эшшо дэри..." Озьы малпаса пыдъёс ик жуммизы кадь. Ӝыны Азаматэз ортчи ни. Пуныос уто. Кыкез сьӧре уиськыны кутскизы. Кытысь куарае меда потӥз. Мар ке быдӟа черектӥськи.

Кутӥз ведь трубказэ ӵужмуртэ. Шудэ вань вылэм.

Ӵукна малпай вал-а, что уин Азамат гурттӥ дэри кӧсатыса ветло? Йыромем ыж кадь. Улонын йыромем мурт кадь. Пеймытын. Для большей драматичности бус уг тырмы на. 

Ярам кытчы мыныны сюрес тодӥсько смутно.

Соин гинэ ваньмыз оз ортчы. Варзи-Ятчие вуыса ӵужмурт шуэ:"Выль мунчоямы пырытэк нокытчы уг нуы". 

Доре вуи 10 часэ ӝыт.

Дорам

Умой семьяен чош ужаны. Озьы секыт уж но каньыл ужаське. Яратисько, ку семьяен чош мае ке планировать кариськом. "Тани татчы улмопу мерттоно, а татчы слива, татчы эмезь.."

Мама толон изён азямы: " Собыдза будид ини, а весь мамаеныд изиськод на. Эшъёсыд серекъялозы".
Мон:" Кин гинэ изе ай. Мед гочалозы. Собере иземзы потыса но изьыны уз быгатэ ини".
Мама:"Мон но дышетскыса городысь бертисько ке вал, анаен изисько вал".

Ильялэсь юасько: Тон Инмарез адзисько шуиськод ук. Кыче со?
Илья кема малпаськытэк: Горд.

Илья кулытиськыса доре лыктэ:"Охо хох... Сюлэмы куалекъя мар ке."  или "ой.. Сюлэмы юн йогаське".
Малы шуса юаськом но "незнай" шуэ.

Атай: "Ну мар та таче?! Малы опять фломастеръёсыдлэсь крышкаоссэ од ворса. Собере куасьмо ук соос. Нуко. Малы од ворса?"
Илья: "Незнай. Уг тодиськы".
Атай: "Та вужъёсыз-а или выльёсыз-а? Мон больше уг ни окты тыныд!"
Илья: "Шыпыт! Пеле пыре куараед".

Мама:"Апаедлы кырза ай кырзан кудзэ садикын кырзады".
Илья:"Уг тодиськы ини. Мон сое удалить кари".

Милям со либо визьтэм, либо визьмо. Незнай. Куддыръя вокщё паймытъя. Солэн милям зрительной памятез туж умой кадь. Букваосыз тодэ. Лыдзиськыны уг быгаты на. Туж чебер букваоссэ гожъя.
Туж визьмо вераське.