28 нояб. 2014 г.

Нунал

День расстройств кыӵе ке. Не, нырысь ваньмыз туж умой вал.
Туннэ параосмес отменили. Изи прямо 11 часозь шумпотыса. Сайкай, комнатаын нокин ӧвӧл, ваньзы доразы бертӥллям. Шумпотыса чуть ӧй шугмы. Хоть мар даурты:  кылзы крезьгур наушникъёстэк, хоть гольык ветлы, хоть йыр вылад. Прямо таӵе мылкыдын астэ независимой кожаськод, нокыӵе туган но кулэ ӧвӧл. Аслыд ачид кузё. Гань-гань сиськыса, конспектъёс гожъяса, лыдӟиськыса, ӝытпал вуиз.
"Арысь аре" А.Г. Шкляевлэсь книгазэ лыдӟыны кутски. Нырысетӥ статьяез ик Верещагин сярысь. Вот сомында лэсьтӥз, нош солэн, оказывается, шайгуэз но "ышемын -пачкатэмын "Нефтемаш" заводлэн территорияз, берло улэм коркаезлэн бервылаз ӝутскемын Удмурт университетлэн 6-тӥ корпусэз". Лэсьты, быдэс улондэ бадӟым ужлы сӥзь, нош тынад бервылэд но уз кыльы...
Так вот. Лыдӟиськи ӧжытак. Боксэ мынон дыр вуиз. Лучше медам ветлысал но та идеальной нуналэз ӧй саптасал...
Морально (мон номыре уг быгатӥськы, пиос монэ только так коказы, нош мынам киы но соос доры уг сузьы. Хотя, нет, огезлэн син дураз йӧттӥ ик) но физически уничтожили монэ. Копак коскай. Нырме ошыса пыри собере раздевалкае, нош отын бодибилдинг нылашкаос чилясь купальникъёсын, каблукъёсын, чуть ли гольыкесь ӧвӧл, жарить карем курегъёс кадь куренесь, нокытыназы кӧйзы ошиськемын ӧвӧл, кузы идеально скелет вылазы кыскытэмын. Нош мон таш-таш пукси скамейка вылэ, валаса, что ӝыт туннэ точно не удался.  Мон соос вӧзын кӧй парсь. Соос азьын кылиськыны но возьыт ик кадь. Кӧт ошиськемын, жугиськыса пӧсямын горд-горд, йырси тур-пар.
Потӥ ураме мылкыдтэк, вокщё мылкыд ышиз кытчы ке. Котыр юэмъёс. А, пятница ук туннэ. Точно. Вӧзам пристал кыӵе ке юэм подросток. Тодматскем, пе, потэ. "Мын,- шуисько,- татысь. Жади, тонэн йырин ӧвӧл. Музыка кылзӥськын люкетӥськод". Всё равно сьӧрам сюлтык-калтык мынэ. Весь мар ке вера, азям тэтчаса мынэ шут кадь. "Сейчас, - шуисько,- рюкзакысьтым мар ке потто". Шумпотӥз. Мон поттыны кутски боксёрской перчаткиосме. "Тренировкаысь бертӥсько, -шуисько,- как раз разогрелась. Только так пельсӧрад сётъяло ӧд ке кошкы". Синъёсыз кымесаз тубизы пияшлэн. Курдаз кадь. Я, пе, всё, уг ни ёрты. Кошкиз.

Резко ӟыгыръяськем ик потӥз буш комнатаям вуыса. Я. Ӵуказе нунал умойгес луоз, дыр.

Этно.

Школаын практика ортчон дыр вуэмен-а мар-а мон весь каким-то образом вуисько школае.
Тодмое филфакысь ӧтиз 84 школае. Отын со ужа. Педагог во воспитательной работе нимаське вал-а? Лыкты, пе, судья луод, милям ортчоз этно мода (толон со вал).
"Ну, тынсыко",- малпай. Мыноно кариськи.
Школае пырем бере, сюлэм ёк! кариз. Та школае пырам вань ини. Кельше. Бадӟым.
Актовой залзы курутой. Советский архитектура, лепнина. Чебер. Йырез онгратӥсь лепнина. Фотоаппаратэз басьтоно вылэм.
25 калыклэсь, кудъёсыз уло Россиын, возьматӥзы дӥсьёссэс. Лэсьтыны, пе, кулэ вал изподручных средств.
Лӧптэм нылпиос сыло залын, возьмаса черодзэс потыны сцена вылэ. Сразу тодэ лыктэ, кызьы ми но оломар но дауртӥськом вал школаын.
Мон пайми, кыӵе с размахом соос дасяськиллям. Кудъёсызлэн вокщё юри вурыса дасямын вал. Самой тодэ кылӥз башкиръёслэн дӥсьсы. Одноразовой медицинской чагыр халатъёслэсь но салфеткаослэсь дэрем, дуръёсыз горд изолентаен, тесьма интые, дэрем вылаз жилет. Зэмос башкир дэремлы укша. Кызьы нылпиослэн фантазизы но тырмем. Даргинецъёслэсь дӥсьсэс возьматэмзы туж сюлмам кылиз. Нылашлэн кузь тӧдьы дэремез, кускысеныз куськыса пыд дорозяз вуремын вал... билетъёс, обычной проездной билетъёс)) Со на самом деле туж чебер адӟиське.
5-6 классъёс зол дасямын вал дӥсь ласянь, нош возьматэмзы лябгес вал. 7-8 классъёс соиныз но таиныз лябесь, азьтэмъяськиллям. 9-11 классъёс пӧртэмесь. Нош возьматон ласянь, асьсэды возьматӥзы, только так эктыса.
Туж секыт вал бырйыны. Сомында тунсыкоосыз вал. Паймымон кадь. Ӧй ик малпа вал.
Выль эмоциос басьтыса бертӥ. Шумпотымон.

27 нояб. 2014 г.

Ченгешонъёс

Толон бер уйинозь пуким Образецен (Аня Образцоваез мон озьы шуисько) дебатъёслэсь юанъёссэ сэрттыса. Вань за и противъёссэ учким, шараям, гожъям тетраде.

Туннэ вал Дебаты. Ортчытӥз Шуд. com Шундылэн мероприятиез, вакчияк вераса. Гожтэмын вал, что луоз ньыль команда кык адямиен. Огез команда лыктымтэ. Ярам, чалякгес ортчоз.
Судьяос. Туж интересноесь, конечно: Богдан Анфиногенов, Никита Москвин но Дима Иванов. Последний кыкъёсыз тодо мар со дебаты, асьсэос шудылэмын. Первой кыкъёсыз удмурт кылэз туж ик умой уг валало. Вот. Но со проблемалы ӧз кылды, потому что ваньмыз туж умой судитьтэмын вал.
Шудонэз нуиз Вероника Ваулина.  Ваулина - со котькытын Ваулина. Быгатэ. Серекъятэ, маза уг сёт, зрительёсын но вераське. Туж деловой образэс солэн вал туннэ. Чукырна)

Мон пайми малы? Лябесьгес ик вал командаос. Весь одӥг верам предложенизэс нэлькыса улӥзы, со ласянь но, та ласянь но. Ку мар ке мында можно вал примеръёс, фактъёс вераны.
Ми тыршим Аняен пӧртэм фактъёс вераны.

Ӧжытак паймигес кызьы радъямын вал шудон.
Мынам ветлылэме вань таӵе ужрадъёсы.
Татын кызьы вал: кинлы ке бырйыны кылдэ вал тема, нош кинлы ке позиция - за или против. Собере котькудӥзлы сётӥське 2 минут позицизэс защищать карыны. Собере эшшо командаос быдэн одӥген сёто юанъёс. Нош юанъёс бере обобщение лэсьто ас позициязылы. Мон пайми таӵе системалы. Москвин но, видимо, паймиз. "Юность " огазеяськонын вокщё мукет правилоос вал. 2 минут огез вераське, собере мукетыз, собере сое оспаривать карыса опять кык минут мукетыз вера. И озьы 4 пол 2 минутэн. Озьы пӧрме вал диалог. Москвин шуиз пумаз:"Решение проблемы так и не всплыло наружу ". Дак оо, малы ке шуоно диалог ӧз пӧрмы.
Кулэ на вал бейджикъёс ошыны. Ато ведущий но судьяос но сураллязы, вунэтъязы шудӥсьёслэсь нимъёссэс.

Воштоногес ик, дыр, правилооссэ Шундылы. Собере эшшо но тунсыкогес луоз. Весь потому что мар ке верам потэ против утверждениоссылы, доказательствооссылы но... но уг луы правилоосъя.

А эшшо вопрос малпасьлы аслыз кулэ вал вань за и противъёссэ шедьтылыны. Милемлы потӥз, что куд-ог юанъёс, утверждениос туж валантэмесь вал. Шуом: "Зэмос удмурт веме туж пайдаё акция". Кызьы татын вералод мар ке, ку даже результатсэ ӧм на адӟе та акцилэсь? Кызьы. Или юан:"Пи но ныл куспын ӧвӧл эшъяськон". Со кыӵе ке слишком философской юан. Попробуй нормальной фактъёс утчаны.

Но зато туж точно, без ошибок, без заминок ортчиз ужрад. Тыршиллям.

26 нояб. 2014 г.

Нуналысь нуналэ

Кыӵе монэ бесит со непунктуальность. Уг яратӥськы непунктуальной адямиосты, кызьы можно котьку бере кыльыны? Кызьы?  Мероприятие 7 часэ ӝыт кутскыны кулэ, но со кутске 7.30, потому что калык опаздывает. Если мероприятие сыӵе но мынэмед потэ ке, куриськы дышетсконысьтыд, ужысьтыд.  Может дырызлы вуэм адямиослэн ужзы тожо ӝегатске, тӥ бере кылиськоды шуыса.

... Толон сыӵе ик ситуация вал.
Удмурт вторник, даралилавка. Пумиськон ӝыт А.Г. Шкляевен. Критикаен выль книгаез потэм "Арысь аре" нимаське. Со ласянь ик вераськиз, вообще литература сярысь, улон сярысь, но пумаз всё равно удмурт кылэн проблема вылэ выжимы, удмурт факультетэз утён ласянь.
Кыӵе кельше кылзӥськыны визьмо адекватной удмурт адямиез. Ваньзэ, маре вераз А.Г. Шкляев дас пол но кылэмын ни ӟуч филология факультетысь преподавательёслэсь. Но татын удмурт кылын. Сыӵе доступной удмурт кылын, не замороченной со выль оломар кылъёсын. Даже ӟуч сямен вераськемез пелез уг ванды, со туж гармонично кылӥське. Примеръёсын ваньмыз син азе пуксе (ӟуч писательёсыз но удмуртъёссэ, но зарубежнойёссэ вераназ часта гинэ пыртэ ), кылзыны но уд жадиськы, ӵемысь таӵе пумиськонын чаляк пельёс шуяны кутско. Туж туала (тросэзлы арлыдо визьпогъёслы та уггес тырмы ), визьмо (начитанной шуо на эшшо) адями, егитъёслэсь вераськемзэс валась, ассэ вылӥе чик но уг пукты. Паймисько котьку сыӵеослы.
Книга сярысь трос ӧм вераське, малы ке шуоно тросэз лыдӟемын ӧвӧл на. Котькудӥзлы лыктэм адямилы сётӥз книгазэ.

25 нояб. 2014 г.

Кулэтэм диалогъёс.

Арнянунал дорын ортчиз вообще странно. Кызьы ке в прострации. Онгырам кадь.

Ӵукна субботае Ильяен колтык -калтык вамыштӥм ӵужай доры. Одӥг гурт пумысь мукет гурт пуме, Илья невозможно дыг мынэ, сапегеныз урам трос колтыртыса. Куазь кезьыт, нырез чепылля. Дор палась кыдёке ӧм вуэлэ на вал кык бускельёсы дугдытӥзы (почти 30 аресъемесь, огезлы точно куамынлэсь трос ни. Кышно ваемын кыкназы но ӧвӧл на).
"Чаль ай, чаль",- шуэ огез. Лыктӥ.
"Мар вералод?"
"Тонэ толон кытчы куразы? "
"?!"
"Куразы кытчы?"
"В смысле куразы? Трос юид-а мар-а?"
"Дак толон мыным бускель шуиз, что тонэ кураны лыктыны должны."
"Мон уг валаськы мар сярысь тӥ. Опять исаськоды -а?"
"Дак чынзэ!"
"Оломар но кылӥськоды нош. Какой на. Ярам, кошким ми. Кезьыт".

Тӥни озьы кылдо оломар веранъёс.
Ӝытаз жингыртэ.
"Мар опять звонитьтӥськод ини? Ваньзэ верай ини кадь, Резиденция азьын".
"Вераськем потэ".
"Мар сярысь?"
"Так. Озьы тазьы тон монэ ымныр шорам послатьтыса лэзид ук. Вож потэ".
"Адями кылэз уд валаськы бере".
И татын йырам чилектӥз туннэ учыр.
"Всё ни, эн ёры. Монэ куразы алигес. Тулыс сюан луоз".
Шыпыт.
"Мар алдаськод монэ? Мон тодысал ини. Ачид тодӥськод мар сюанад луоз. Да и уз луы со вообще".
"Тынэсьтыд юаса уз улэ".
"Эшшо как".
"Акыльтӥськод".
"Сергеева, заколебала. Шу, что алдад "
"Ӧй. Тулыс сюанэ ини". Серем но потэ кадь, бӧрдэм но потэ кадь.
"Вот алда, алда. Вот тулыс ик кураны лыкто. Бичало эшъёсме, ваё 3 сюрс роза и нокытчы пырон пась уд ни шедьты. ".
"Кызьы пыриды - озьы ик потоды".
"Тани, адӟод".
Вож потыса телефонме кысӥ. Котькуд вераськон кыӵе ке каламбур.

Мар адямиос то та дунне вылын? Уг валаськы. Секытэсь. Яратонэнызы ӝокато, кекато, акыльто, адӟем-потостэм асьсэзы карыса.
Яратон со каньыл, капчи, мылкыдэз ӝутӥсь луыны кулэ, а не кыӵе ке зӥбет.
Странь.

24 нояб. 2014 г.

Дор.

Гуртамы вордӥськиз писатель Николай Васильев, кин уг тоды на вал. Солэн коркаез али но сылэ на. Нокин кизэ но ӧз вырӟыты та коркаез музей карыны. Тус-тас луиз. Кин но ӧз улы отын. Туж кема улӥз туж начар кытысь ке лыктэм семья, юись, трос нылпиосын. Каллен лапасъёсыз, гидъёсыз корка котырысь кесяськизы эстӥськон пулы. Нош али отчы улыны пыризы ӟучъёс, городысь кадь. Котыр лэсьтӥськыны кутскизы: выль капка но забор пуктӥзы ини.  Котькуд арня вуыло но мар ке весь ужаса кельто. Нош алигес тани кылӥ, что пиосмуртэз кутскем удмурт кылын тунсыкъяськыны. Вӧзаз ик родственникъёсмы уло, вот и вера: "Лыктэ, юа кызьы луоз таиз, кызьы соиз". Малы, пе, кулэ ини одно дышетыны, ваньзы ӟуч кылэз тодо ук. Ма, пе, тодоно, татын ваньзы удмуртъёс ук. Шонертэм ке но, вераны, пе, турттэ дышетэм удмурт кылъёссэ.

Мон котьку паймисько адямиослы, кудъёсыз кутско дышетыны удмурт кылэз.
Нырысетӥ классэ мынон азям, вӧзысьтымы бускель коркае лыктӥз семья. Кышноен карт, кык нылъёссы. Огез 11 классэ потэ вал, нош кыкетӥез - 9. И со кык бадӟым апайёс эшъяськизы нырысь ик монэн. Соос туж паймизы вал мынам чылкыт ӟуч кылын вераськемелы. Кызьы сыӵе умой вераськиськод, если тон каждой нунал ӟуч сямен уд вераськиськы?. Соос косӥзы монэ дышетыны. Тодӥсько на ай кызьы соос листок вылэ словарь лэсьтӥзы, огпал колонкаяз ӟуч, огпалаз удмурт. Собере ини соос эшъяськизы олокинен но. Удмурт кылзы вӧляз. Соосын луэ ини вал берло вераськыны удмурт кылын, нош соос тыныд ӟуч сямен, яке удмурт сямен вазё.
Туж мусоесь адямиос вал. Кошкизы. Незнай али кытын. Нылпиоссы но вань ини, дыр.
Гуртын чаляк ваньзы дышо, потэ-а уг-а, всё равно дышо.

Кырӟаз гитара

Кырӟа, гитара, кырӟа нимаське вал таиз удмурт дискотека.
Иванова Настяез но Белослудцев Ваняез адӟыны лыктӥ.

Дарали ветлэ, чуть ли уг лоба. Мылкыдыз умой, лӧптэмын. Ма солэсь лавказэ туннэ рекламировать каризы. Бадӟым экран вылын (умой малпан кстати, удмурт реклама со бадӟым экран вылын).
Солэн лавкаысьтыз ик удмурт дэремъёсын нылъёс эктӥзы вашкала гоу -гоу. Нет. Зэмос удмурт куэм дэремъёсын ик эктоно соослы.
Умой со, экто шуыса. Мед егитъёслэн син азязы луоз со.
Светлана Белых кырӟаз. Ненег кырӟанъёс. Только, видимо, не клублы.
Настя Ивановаез шумпотыса, шуныт пумитазы. Мон даже пайми. Тросэз соя кырӟазы. Кырӟанэзлэсь кылъёссэ тодо.
Туж ассэ йыг-йыг возе сцена вылын, тросэз артистъёс ито волноваться каро.
Собере Ваня потӥз. "Лушкем дуннезэ" кырӟаны кутскыкуз, нылъёс жиетыса пумитазы. Балетной подтанцовкаез вал. Кыӵе ке нылаш. Неизвестной.
Выль кырӟанзэ кырӟаз. В своем духе, ческыт куараеныз, нёжъяса.

Пушкин так и ӧз кырӟа. Возьмай, возьмай.

Ӝокыт. Кеканы кутскисько кадь, эшшо со ӵынэз лэзё ке.. Тросгес гримеркаын пуки. Татын тожо аслаз улонэз.

Нервноесь кыӵе ке адямиос вал. Ӧжытак эктыны потай, ито берын нылэн пи ченгешыса улӥзы. Гардероб палан вполголоса нервно разбираться кариське вал охранникъёсын кыӵе ке кудӟем пияш. Ураме потӥ, шокчи. Вамыштӥ. Берам бызем пыд куара кылӥськиз. Сюлэм тэтчиз. Берыктӥськи. Озьы ик малпай.
"Ойдо келяло",- шуэ.
"Сӥть ӧвӧл-а? Мын кош обратно. Синмы медаз адӟы,"-шуисько. 
"Давай, эн кутскы. Келяны гинэ турттӥсько ук".
"Кулэез ик ӧвӧл. Сейчас быдэс площадь тыр черекъяны кутско."
"Ма черекъя. Одӥг уйзэ пуко, ничо".
"Иди короче, ачид тодӥськод кытчы. Не дай бог берыктӥськи ке, адӟи ке..."
Как ни странно кылзӥськиз. Сюлэм общежитиозь вуытозям успокоиться кариськиз.

...Я. Каламбур кыӵе ке.
Битва диджеев со не просто сочетание то, оказывается.  7-тӥ араз удмурт дискотека оломар но адӟоз , дыр, ай.

20 нояб. 2014 г.

Виртырем.

Толон монэ опять культурно просвещать каризы)
Национальной театрын Les Partisans ъёс возьматӥзы "Колбаса" постановказэс. Та постановкаез учкыны мыным весь мар ке мешать каре вал, котьку кыӵе ке причина сюре вал, адӟытэк кылисько вал.
Сыӵе эстетической удовольствие мон кемалась ӧй ни басьты вал. Кыӵе соос крутоесь! Кыӵе соос быгато шудыны. Будто уг но шудо, будто тынад син азяд ортче адямиослэн улонзы. Нокыӵе пафостэк. Огшоры зулё, чын-чын улонын кадь.
Мынам потэ таӵе ик удмурт постановкаос учкеме.

18 нояб. 2014 г.

Презентовачкизы

Именно озьы шуысалзы Пурга палъёс.

Туннэ удмурт комиксъёсын потӥз пичияк бичет. Удмурт комиксъёс суредамын вал "Шундыкар" лагерысь "Суредасьёс" отрядысь нылпиосын.

Чисто шундовской тусовка вал кыӵе ке. Пыри-а ӧй-а ӟыгыръяны кутскизы, киысь кие питырскисько.

Нылпиос но отрядысь вуиллям, пайми ик. Мон чисто Миша Николаевез поддержать карыны лыктӥ. Шумпотӥ Марина Прокопьева но лыктэм шуыса.

Дарали йӧн-йӧн лавкалэн кузёез кадь. Паймыса ик быри. Удмурт дэремен, вакчи саесо дукесэн, туфлиен. Буяськемын, йырси интыяз пуке. Туала удмурт интеллигенцилэн тусыз, видимо, таӵе ик луыны кулэ.
Тронина почти вань "Шунды" правлениеныз вуэм.

Я, бен, туж умой кадь.
Ӝытэз нуиз Жанна. Со "Шундыкарын" старшой вожатой вал. Так вот. Жанна кема аръёс ӵоже дышетскемын Перьмын. Чылкыт удмурт кылын вераськыны кылыз биниськегес ик. Со "удмурт тусовкаысь" нокине уг тоды. Со туннэ тодӥз кин со Дарали. Но со ӟечок, тыршиз. Ответственной адями туж. Юрттыны тыршись.

Омырез всё-таки секытгес ик вал. Мон уг тодӥськы мар вераськонъёс вал до начала, малы ке шуоно мон вуи за три минуты до начала. Мар ке шӧдӥське вал, что секыт кыӵе ке, напряженноесьгес адямиос. Мон ас дуннеям ветлӥ.

Нылпиос возьдаськизы вераськыны, Миша но трос ӧз вераськы. Кырӟаз Влада Митофанова но Peace Pu группа. Шуом, шулдыртӥзы та ӝытэз.
Суредъёсынызы пичияк выставка выллем но лэсьтӥллям.

Видимо кык эксейёс одӥг интые вуо ке, со туж секыт но омыр тырмыны уг кутскы. Эксейёс хоть кыкназы мусоесь но кибашлыесь и котькудӥз аслаз королевствояз ас ужзэ нуэ, ас философизэ.

Вот стерва

Короче, выношу со из избы нимаське таиз пост.
Толон ӝыт Тронина Оля шумпотыса вераз милемлы (арт-экспедициослы), что наконец-то вуиз ролик арт-экспедиция сярысь. Гочатӥз но ӧз поны. Туннэ ӵукна гинэ понэм. Трафике бырыса, мырдэм-мырдэм переменаос вискын учкыса вуи видеоез, кудӥз кыстӥське почти 30 минут.
Снимать кариз Влад Степанов 10 нунал киысьтыз камераез ик ӧз усьылы. Со ик монтаж лэсьтӥз (кызьы лэсьтэмзэ но тодӥсько. Нош мынам улӥгес гожтэме эшшо золгес поттоз вожзэ. Хотя, видимо, мыным не привыкать солэсь вожзэ поттыны).

Умой:
- оооооооо, кыӵе ностальгия, кыӵе мусоооо.
-снимать карон манерез тунсыко. Тунсыкоесь куд-ог ракурсъёс.
-возьматэмын гурт калык, кылзӥськыны луэ соосты.
-возьматэмын котькуд гуртысь кырӟан яке веран (хоть ӧжыт ке но возьматэмын, что арт-экспедиция яратэ но тунсыкъяське вашкалаен )
-возьматэмын кызьы (кудогъёсыз) мастер-классъёссэс ортчыто, емышъёссэ со мастер-классъёслэсь.
-вообще классной музыкальной фон быръемын

Аламаез:
-"ооооо со мусооо, со ностальгияяяя" кин арт-экспедициын ӧй вал, уз вала сое та видеоез учкыса
-секытгес валэктытэк валаны мар вообще происходит та видеоын. Хотя, мон усугубляю кадь.
-может тросгес серем учыръёс пыртоно вал? (А идея, можно так ке сюжет, кудӥз усьтысал мукет палысен котькуд участникез арт-экспедициысь или кызьы клипез снимать карыны вырим )
-да, чёрт, мон эгоист. И мыным уг кельшы, что пумаз ньыль адями гинэ вераськиз (ваньзы ке вераськысалзы, учкись хоть зрительно тодматскысал, кин пыриськиз та экспедицие ).
-мыным уг кельшы, что мынэсьтым но Марайколэсь ужамзэ вообще возьматэмын ӧвӧл. Псих потӥз.
-мыным уг кельшы, что весь одӥг и тот же ымныръёс син азьын.
-самой берпуметӥ слайдын тау каронъёсын Никонов Андрей пыртэмын вал-а?(а пыртэмын вылэм, али учки:)

Валасько мон, что 30 минут куспын 10 нуналэз возьматыса уд вутты. Вождэс эн вае.

15 нояб. 2014 г.

Мон отын вал!

Пермской крайлы мон синмаськи на вал 2 курсын. Соку мон нырысьсэ вуылӥ пещерае.  Губаха нимаське вал кадь селоез.
Пермской крайын копак инкуазь кузёяське.  Бесконечной нюлэсъёс, гурезьёс, бусыос. Сюрес но электроен юбоос гинэ возьмато - адями татын вал. Сюлэм позыртытӥсь бырем но бырись гуртъёс кылё сюресъя. Даже бадӟым гуртъёс но куштӥськем кадь адӟисько, малы ке шуоно кышъямын юртсы маин сюрем: вуж ӧсъёсын, кыӵе ке пуосын, вуж укноосын. Баракъёс кадь. Со ӟучъёслэн гуртсы шуыса сразу адӟиське. Удмурт адями озьы юртсэ ямсыз уз кары. Питере поездэн мыныку но таӵеесь ик гуртъёс кылё.
Ӟучъёс гинэ пуктозы гуртсэс бадӟым ву доры.

"Географ глобус пропил" кино бере эшшо но синмаськи та палъёсысь инкуазьлы. Со ӝужытэсь, из ярдуръёс... Пичи Ирландия кадь.
Ӝужытэсь гурезьёс копак кызъёсын шобырскемын. Сыӵе инкуазьлэн кужмыз шӧдӥське сыӵе суредъёс шоры ас синмыныд учкыса!

Губахае ветлыкум, пещера вал спелеологической, не туристической. Маиныз пӧртэм? Спелеологическойёсаз ачид кечыръяськыса ветлӥськод, копак дэриен наштаськыса, котмыса. Со сыӵе но экстрим, астэ вормон. Пещера - со вообще мукет дунне. Пещера пушкын зэмзэ но валаськод - адями со так, пыры гинэ. Ничтожной, ляб мар ке инкуазь азьын. Пеймыт но шыпыт соге тонэ пещера пушкын. Куд-огез пичи пространствоослэсь ик курдаса обратно потылӥзы вал, нош кин ке бӧрдыса быдэс маршрутсэ потэ. Зэм ке, отын чик но ӧжыт ӧвӧл пространствоез. Отын мар ке мында пространствоез, чылк-чылк омырез. Пещераосын гинэ сыӵе чылкыт омыр, дыр. Со пырем бере ик шӧдӥське. Дунне йырпушкад берыктӥське ик кадь пещераысь потэм бере. Тон отчы мынӥськод, валаса, что отчы ик кыльыны быгатӥськод...

Нош туэ Кунгурской пещерае мыныны кылдӥз. Таиз туристической. Валамон ини малы. Татӥ просто музейтӥ кадь ветлӥськод. Лэсьтэмын туристъёслы вӧльыт сюрес, подстветкаен чеберлыксэ пещералэсь возьмато.
Мон нырысь нырме ик оши вал тае адӟыса, но собере валаса, кыӵе со чебер (кылъёсын уд вера), валай, что не зря лыктӥ.
Экскурсиос, пе, та пещератӥ лэсьто ини 1914 арысен. 100 ар туэ. Даже йыре пуктыны уг луы, кызьы азьло свечаосын, факелъёсын ортчо вал маршрутэз. Электро кыскытӥллям 1957 арын. Кузьдалаез 5. 700 иськем пещералэн. Ӝуждалаез ми палась Кам дурысь гурезьёс кадь. Уд но оскы, что сыӵе гурезь улын сыӵе тайна.
Вӧзаз ик Кунгур город. Кыӵе со азьло бай вылэм, дыр. Малы ке шуоно, мар ке мында купеческой коркаос. Трос огшоры коркаослэн фундаментсы но, адӟиське, азьло дыръёслэн. Только нокин но со корка шоры, видимо, уг учкы. Каллен-каллен куажгало. Соос туж чебересь, Ижысь даже сыӵе чеберзэ уд адӟы. Город шортӥ ик Сыва (дыр) шур кошке, соин выжъёс котыр.
Нош черкъёссы кудмында. Мон пайми. Сыӵе пичи город ке но. Сыӵе начар пуктэм коркаосын (опять маин сюремын ). Огез черк азьын базар ик вал. Будто кыӵе ке 19 дауре вуи кадь. Черкез до того вуж ини, учкымтэ, укноосыз пильылӥськемын, одӥг куполэз уг тырмы... Сыӵе жаль кадь. Ваньзэ сое реконструировать карыса, выжыкылысь кар кадь ик луысал...
Вот кӧня меда сыӵе пичи каръёс, купеческой прошлоен? Кӧняез озьы каллен, сисьмыса даурзэ быдтэ меда? Малы асьмеос учкыны ум быгатӥське, малы чебер котырмес возьыны ум быгатӥське меда?
Со Эстонииысь ик Выру городэз басьтыса. Сыӵе ик бырись, сисьмем город. Ваньмыз тожо каллен куажга. Но куажга то чебер, йӧн-йӧн. Котыр утялтэмын, чылкыт но сяськаос. Хотя куштӥськем, вуж, пулэсь коркаос центральной урамазы.
Эх.

Мон Кунгур городэз адӟыны эшшо ветлысал на.
Пермской инкуазен но мусояськысал на.