29 июл. 2015 г.

Серекъялод-а меда, бӧрдод-а меда?

Мама жингыртэ но вера: "Пукиськом куиньнамы чай юыса: мон, ӵужаед но песяед. ӵужаед вера, что Мариналэн одноклассницаез таяз арняе бизе шуыса. Песяедлэн реакциез: "Э. Дугды ай. Асьмелэн Маринамы бизьытэк уз кыльы а? Аресэз вуэмын ини. Старая дева шуозы сре". Ну ми серекъям ук".

Мон но серекъяй. Просто 11 нылъёс пӧлысь 4 гинэ на бизьымтэ кылизы. Соин, видимо, песяй сюлмаське :))

Мама жингыртэм бере ик, кыӵе ке удмурт пияш контактын гожтэ: "Ойдо тодматӥськом. Туннэ ӝыт мон гуртад вуо, али чорыгасько на. Ӝыт чорыген сур юом". Мон огнам корка трос гор серекъяны кутски. Гурт романтикъёс сыӵеесь, оо. Кытысь марзэ но ӧз вера, туспуктэмъёсыз но ӧвӧл. Бигер гуртысь малпай.

Дунне малпанъёсыз быдэстыны быгатэ шуо кадь. Пауло Коэльолэн верамезъя.

Песяй, пока эн малпаськы на :)

28 июл. 2015 г.

Нунал

Мынӥсько туннэ урам кузя. Шонергес вераса, дыртӥсько туж. Урамез потӥсько. Опять урам. Светофор. Возьмасько. Кырыж учки вӧзам сылӥсь песятай шоры: йырсиез тӧдьы, пельпумозяз, тушез но кузь, шляпаен, сьӧд костюмен, боды борды пыкиськемын, мукет кияз чумадан (документъёслы, но со вуж чумадан, бадӟым, крокодил ку выллем). "Да ну", - малпай.

Сюресэз потӥ. Вамыштӥсько, дыртӥсько дугдылонни пала.

Чилектэм кадь йырам луиз. Балин. Тротуар шоры султӥ. Со же Михаил Гаврилович Атаманов вал. Берыктӥськоно-а ӧвӧл-а? Уг. Мон же соин огпол но вераськемын ӧвӧл. Но сыӵе потэ вераськеме, потэ вераме кыӵе солэн берло книгаез тузи..
Нош со писпуос пӧлысь тротуартӥ кошке ини боды бордаз пыкиськыса.

И малы ке та суред тодам вайытӥз "Мастер и Маргаритаез". Уг тодӥськы малы озьы. Ку Берлиозэн Бездомный пумисько Воландэн Патриарший тымет дорын.

Тунсыко кадь. Малы именно со суред?

Лэсьтэ "Сахарын " Атамановен пумиськон. Топонимъёс сярысь вераськон.

20 июл. 2015 г.

Эмъяськонниын

Кытын сущий ад? Ёрос больницаын.

А кутске со сюресысен, кудӥз васькытэ тонэ Алнаш ёрос больницае. Сое сюрес но уд нима. Кызьы меда сыӵе сюрестӥ нуо скороен адямиез.

Бӧрдон калэ вуи со нылкышноосын, кудъёсыз ортчо медосмотр. Лыктэ огез, басьтэ сьӧраз инты 10 адямилы. И котькуд кабинет дорын озьы.
Лэзьыны косӥськод висказы, нош соос мар ке ныр улазы верало но уг лэзё. Собере сюро кыӵе нылкышноос, кудъёсызлэн аресъем нылпиоссы пуко атаенызы-а песятаенызы-а машинаын и татчы именно пыраны кылиз на.

Ас поннад вань чебер кылъёсты вераськод но дальше сылӥськод. Пукон интытэк, коридорын сылыса.

Ваньзылэн психсы потэ но и кутско кызьы сюрем пыраны, жингыръяло тодмо врачъёссылы но соосыз пыртаса ветло.

Бӧрдон калэ вуи но ас поннам малпай: нда. Сноровкае бырем. 11 класс бере медосмотрез ортчи нунал куспын, только так больницатӥ лобаса. Таре нош одӥг кабинет дорын сылӥсько ини 3-тӥ чассэ...
 


Суред

Тон зажиточной адями гуртад, если тынад:
- кирпичлэсь коркаед, яке "по последнему писку архитектуры" обшить каремын кыӵе ке но пластмассовой хренен, кудӥз шундыя гужа
-липедэд, капкаед, а кудӥзлэн заборез но сайдинген вӧлдэмын
-укноосыд пластиклэсь. Эшшо ке наличникъёс тыремын, а подоконникъёсад сыло орхидеяос, нош укно улын палисадникын будо пӧртэм сяськаос
-корка котырад турынэн, куроен туйылэм лапасъёс
- капка азяд сылэ ке отечественной машина. Ну сверх, если иномарка
-гидкуазяд - пичи трактор.

Сыӵе коркаослэн кузёоссы син азям ик пуксё. Шаплыесь нылкышноос кыӵе ке цветастой не то халатэн, не то дэремен. Вӧзазы дыг-мог вӧстэм картъёссы.

17 июл. 2015 г.

Сиськон куспын

Куаш-куаш пуртэн вандыса сиисько арбузме. Пурт йылысь ик. Мама озьы дауртыкум котьку тышкаське вал: "Сотэк но йӧнтэм, эшшо но тани йӧнтэм луод. Пурт йылысь сиыны уг яра!"

А татын нокин номыр уг вера.

Пичи гинэ пластмассовой ныдэн пурт. Мар пурт меда, аслам ӧвӧл. Вообще татын, кытын мон али улӥсько, куинь пурт. Огез нянь вандылон, "под азвесь" лэсьтэмын, копак кортлэсь, ныдыз чебермамын. Кыкетӥез сярысь верай, нош куинетӥеэлэн ныдыз пулэсь, сӥль вандылыны.

Дорын милям вань одӥг пурт, кудӥзлэн туж бадӟым кужмыз. И со одӥг. Соин ик барангы палаське, нянь шормаське. Солы кытын ке 18 ар ни, дыр. Больше пуртъёсмы ӧвӧл. Соос пото но ышо кытчы ке. Та пересь пурт котьмалы но яра. Сое лэсьтӥз атаелэн двоюродной братэз, кудӥз 15 ар талэсь азьло кулӥз.
Мама шуэ: "Вот котьмалы кибашлы адями вал. Тани та пуртэз но синпель кадь кылле. Тӥяськыны но уг вала, уг но ышы".  Ныдыз пулэсь, курень. Кытын ке 25 см ачиз. Кӧня асме сомында ик та пуртэз но тодӥсько. Огпол но син азьысь ышылэмез ӧвӧл, нош мукетъёссэ котьку утчано.

Вань ук сыӵе пичи арбериос дорын, кудъёсыз тонэн ӵош уло. Соос весь ки улын, кытчы ке поныса, вунэтыса ыштӥськод ке, одно ик сюро.

Вань на милям эшшо со пурт выллем ик качимы. Медицинской качи солэн нимыз. Со чынзэ но медицинской. Кортлэсь,  азвесь кадь ик. Бадӟым но ӧвӧл. 15 см может. И тожо кӧня асме тодӥсько сомында ик та качиез но. Со мар ке кадь удобной. Гижы вандыны, кагаз. Ноку тӥяськемез но ӧвӧл, ныжомемез но. Нош мукетъёсыз чаляк тӥясько, ышо, ныжомо. Вал солэн эшез. Бадӟым кортлэсь сьӧдэктэм качи. Соин атай йырси ӵышке вал. Куаш-куаш. Но куке басьтӥзы йырси ӵышкон машина, со качи кытчы ке но чиптэм-чаптэм ышиз. Куатаськиз, дыр.

Сыӵе арбериос кузёос кадесь. Кужмоесь. Улонэ пыӵамын.

Вал сыӵе гожъяськись Тэффи. Пичи гинэ рассказэс нимаське "Желтый воротник". Отын гожтэмын: "Человек только воображает, что беспредельно властвует над вещами. Иногда самая невзрачная вещица вотрется в жизнь, закрутит ее и перевернет всю судьбу не в ту сторону куда бы надлежало ей идти".

Арбериос кужмоесь.

Арбуз

Гочамы туннэ арбузлы. Шонерзэ вераса, мон гочай.

Курдаса ик басьтӥм. Уд вала нокызьы, кудӥз вуэмын ини, а кудӥз ӧвӧл.

Июль гинэ ай, нош арбузъёс сыӵе ческытэсь ини. Сакыро, горд-горд. Удалтӥз ик)

Азьло, пичи дыръям, ми гуртэ арбузъёс вуо вал сентябре. Вуэ вал бадӟым камаз мар ке мында арбузэн и вошъяло вал соосты барангылы. Ӵапак сентябре ваньзы барангы бичаны кутско вал. Али со куазь воштӥськемен-а мар-а августэ ик бичаса быдто ни.

Сентябрьлэсь вазьгес арбуз сиыны кылдэ ке, самой крутоез луиськод вал эшъёсыд пӧлын.
Уксёен дуно усе, нош картошкаен дунтэм. Гуртын ваньзы трос мертто уго. Соин но анай-атайёс шуо вал, дыр: "Августэ вуэмтызэ вузало. Тани барангы бичамы ке, сразу 5-10 басьтом". 

И пукиськод вал сомында арбузэс сиыса. Солань-талань ветлыса дорысь сьӧросэ.
Дышетӥсь но сре серекъя, сразу адӟиське кин трос арбуз басьтэм шуыса :)

15 июл. 2015 г.

Уж

Мон же ужаны кутски))

Гуртын мар карод таӵе зор куазез? Шонер. Номыр. Сыӵе валантэм возе ассэ инкуазь. Нунал куспын шунды но потэ, жаль-жаль зоре, гудыръя, чилекъя. Астэ куддыр Петыркарын кожаны кутскиськод. Адями мар дӥсяны но уг вала. Кин ке шортикен, нош вӧзаз ик курткаен адями сылэ.

Так вот. Гуртын номыр уд кары шуыса, малпай кӧня ке уксё поттыны гужем куспын. Тем более сыӵе ӧжыт ужез быдэстыса, умой ик уксё сётӥське. Верстальщикъёс ӧжытгес басьто, аха.

Дипломме басьтыса, кутски ужаны. Выж миськисько ӵуш-паш гинэ котькуд ӵукна 7 часысен. 2 этаж 30-а 50-а метръем (Юмшанлы как раз ивор, аха. Мар карод на бакалаврлэн дипломеныз? Конечно, выж миськод ).

Миськисько, миськисько. Ужасьёс ӟечъяськыса кошко, кудъёсыз но соосыз йырзэс урдыса. Бур ӵукнаен шуыса вазиськод но кыӵе ке отброс от общества кадь шоре учко, пинь вискысьтызы потто: бур ӵукнаен...

Нош мон ваньзэ чаляк миськисько 2 час куспын но васькисько аслам каморкаям. И 11 часозь отын лыдӟиськисько. Типа дежурю.

Ну и мед учкозы. Мыным маиз. Шонер ук? Уж - со везде уж. Котькуд уж ас сяиныз секыт но пайда ваись.

Август вуиз ке кошко. Мукет интые. Собере верало кытчы.

11 июл. 2015 г.

Йырчукин

"Вот, асьмеос но сыӵе улонэ кылимы",- шуиз мамалэн эшез.
Та верамез гинэ на кылӥ, ку наушникъёсме пельысьтым куштӥ. Бертӥськом вал Алнашысь машинаен.
Собере юай, мар сярысь вераськизы шуыса.

Вань вераськон кутскем вахтае ветлӥсь воргоронъёс сярысь. Азьло, пе, озьы азербайджанецъёс ветло вылэм. Быдэс семьяен. Соос, пе, ми гуртын пуктэмын мастерской гаражъёсты, амбарез, КЗКаез но эшшо мае ке.
Уло, пе, вал вуж клубын. Кӧня соос соку ик уксё потто вал, дыр. Нош ми,пе, соос шоры серем пыр учкиськом вал, ум валаське вал кызьы озьы можно ветлыны. Бродягаослы кельшо вал. Нош табере ваньмыз мукет сяин. Асьме картъёс ветло вахтае, нош соос возё кафеосты, уло семьяосынызы.

6 июл. 2015 г.

Аръёс ортчо

Алнаш синме пырыны кутскиз ини кадь. Куинетӥ нунал подряд татын ини.

Кошкиськод урамтӥ, адӟиськод школа дыр эшъёсыз. Олокыӵе но ёрос школаосысь. Мон быдӟаесь ик.

...И йӧтэ мыным, что школаез мон йылпумъяй 20 ар талэсь азьло. Пиосъёс зэмос воргоронъёс кадесь луэмын: бышкись туш, ымазы тамак, машина руль сьӧрын. Нылъёс мыно коляскаен, куд-огезлэн коляска вӧзаз эшшо мынэ на пичильтыток. Нылъёсты куддыр секыт ик тодманы кадь. Тожо зэмос нылкышноос: тазаесь, ветлэмзы но гань-гань луэмын, семья ужъёсын йырзы поромемын.

А мон соос вӧзын асме школьник кадь кожасько. Рюкзакен, тури-пери тӧлъя пурӟись йырсиен, кроссовкиен, толстовкаен но кесяськем штаниен.

А школаез 4 ар талэсь азьло гинэ быдтӥм.

5 июл. 2015 г.

Сайкиське!

Ну оглом вераса, Сайкыт Инбам вообще не сайкыт вал. Кисьтыса медаз гинэ зор шуыса сылӥзы кадь адямиос.

Быдэс концепцизэ валан понна, кулэ вал, дыр, ӵукна мыныны отчы. Турслёт вылэм кадь, ну и эшшо мар ке. Мон ке вуи 5 часлы. Учкеме потӥз Элькуновидение. Егитъёс.
Кыӵе ке "и скучно и грустно". Кыӵе ке ваньмыз со вал неестественной. Малы? Малы ке шуоно снимать соосты каризы телевидение. Поздеев ветлӥз сцена вылтӥ татын золгес чабконо, тати ӧвӧл...
Вал кырӟасьёс пӧлын умойёсыз.
Зол куараен. Пияш кельшиз. Но костюмъёссы шоры учкыса, сцена шоры учкем ик уг поты. А-ля удмурт дӥсь. Псевдоудмурт костюмъёс. Син азяды пуктӥды-а. Куд-огъёсызлэн РДКа закромаосысьтызы поттэмын вал кадь, кызьы нафталин зын ӧз поты. Огъёсызлэн вокщё дэремъёссы вуремын вал штора басмалэсь. Сыӵе чилясь узоръёсын басма.
Возьыт вал Алнаш понна. Кык пыриськись вал, кыкез но удмурт сямен уг верасько (а мон только мактаськыны кутски вал мукет ёросъёсысь эшъёсылы, вот милям Алнашын котькытын удмурт сямен вазьыны луэ, тани понедельнике сбербанке пырай, вань кассаосын удмурт сямен верасько шуыса). Эммм... Ма, ярам. Зато чебер кырӟало ук.
Эшшо кудӥз но соиз уг верасько вал кадь, валало гинэ.
Пайми Сарапулысь пыриськизы шуыса.
Кырӟазы на тодмо артистъёс. Анна Плотникова, Татьяна Ишматова, Лади Свети, Алина Антонова, Богдан Анфиногенов.

Будто рос-прос сценарий гожтэмын ӧй вал.

Быриз. Луиз вис, кудаз адямиос паймизы мар карыны. Татын луэ вал кыӵе ке мастер-классъёс ортчытыны, наверно. Но ярам. Ми кошким поръяны. Ӧжытак зор но кыдыраз кадь.

Кутскиз позыръяськон. Адямиос каллен кыстӥськыны кутскизы. Тросэз, мон кадьёс, жалязы 250 манетсэс но ӧз пыре котыртэм пушкы. Ярам, мон шедьтӥ аслым уж, сылӥ вераськыса кемалась адӟем адямиосын. Мукетъёсыз незнай, сылӥзы котыртэм сьӧрын концерт учкыса, эктыса. 
Полиция но охранникъёс мар ке мында вал. Юэмъёс мында ик так ке.
Огшоры позыръяськон вал кадь. Кырӟаты вал татын тросгес артистъёсты, а не только Богданэз. Ярам.
Эктӥсьёслы вал шулдыр. Ачид шумпотӥськод ке, котыр но шумпото йӧтэ ук.
Нырысетӥез Сайкыт Инбам умойгес, пе, вал.