28 дек. 2013 г.

шыпыт

Мар со выль ар? Уг тодӥськы. Ар бӧрсьы ар мынэ. Адямиос возьмало мар ке выльзэ. Мон уг. Нокыӵе выль ар зын ик уг поты ай, нокыӵе выль ар шӧмез уг шӧдӥськы. Да, ноку но шӧдэме ӧвӧл, зэмзэ вераса. Ярпуз (мандарин) зын но выль арез не напоминает, кыз зын но. Алама, дыр, таӵе ямсыз вераськонъёсын но мылкыдэн выль аре выжыны. Нош мар карод озьы ке? Потэ небыт шобрет улын пумитаме, огнам, пеймытын, шыпытын.

27 дек. 2013 г.

Искусствнной

Туннэ милесьтым курсмес бичазы. Милям гинэ курсмылэн проблема: 5 адями ӧз бичаськы 2 январьлы олимпийской тылэз пумитаны. "Да кызьы озьы,-урод вера милемлы зам.по воспитательной работе, -тӥ уд мынӥське, ректорлэн приказэзъя ук со! Тӥледлы университет сомында уксё быдтэ, тросэз тӥ пӧлысь вылӥ ӝутэм стипендия басьто, а тӥ уд быгатӥське пунэмзэ берыктыны сыӵе пичи ужен!!!" Собере возьыт даже мар берло милемлы вераз.
Тӥни озьы массовка бичало олимпийской тылэз пумитаны. Возьыт кадь мар ке.
Тодӥсько на 1 мае ӧм мынэлэ тожо демонстрацие, ваньмы объяснительной гожъямы.

Искусственной эмоциос, искусственной праздникъёс.
Принудительной ваньмыз

26 дек. 2013 г.

Книгаос, книгаос, книгаос...

Толон сылӥсько библиотекаын. Урмыса пыризы кык пиос обходной листокен. "У нас книг нет, мы всё сдали! Да и, вообще, мы сюда ни разу за учебу не заходили". Собере мон шоры учкиз мар ке. Мон со шоры кызьы ке оломар кадь учкиськем-а мар-а, со эшезлы шуэ:" Что-то мне стыдно стало"... Возьыт луоз уго. Мар соослэн дышетскемзы? Мар вообще соос татын каро?

Туала книга, валамон ини, нокыӵе ценность не представляет. Мар шуод на. Ми паймыса, ыммес усьтыса кылзӥськом дышетӥсьмес, ку со милемлы вера, кызьы соос пинал дыръязы ватыса лыдӟо вал книгаосты. Кызьы нырысьсэ лыдӟиз Пастернаклэсь "Доктор Живагозэ", кудзэ уг яра вал лыдӟыны. Может соин но азьло сыӵе зол ярато вал лыдӟиськыны? Азьло книга но ӧжытгес  вал. Тросэз цензура пыр уг поты вал,  ватыса лыдӟоно луэ вал (кыӵе ке адреналин). Нош али.. Маиз но ӧвӧл, кыӵеез но ӧвӧл. Лыдӟы но лыдӟы. Эх.. 

Ахматовалэн сю ар тырмонэз дыръя, одӥг бывший ГУЛАГовской заключенной тодаз ваиз:" Монэн ӵош лагерьын вал одӥг бадӟым мурт, кудзэ тоже пуктӥллям. Нош со пуксён азяз ай эскере вылэм, мар заключённойёс сьӧразы басьто вал. Ахматовалэн пиез басьтэм Гомерлэсь"Илиадазэ". Эскерись учкем книгаез, бугыръям но ыргалтэм. Нош Ахматовалэн пиез, пе, шуэм:" Калык, кудӥз ыргалляське сыӵе книгаосын, ноку но уз вормы."



24 дек. 2013 г.

Эпической нунал

Кылзӥсько "Мурӝолэз". Эктыса ик кошкем потэ. Син азе пуксе кызьы Богдан тэтча сцена вылын, кызьы бераз экто нылъёс.. Мусоесь.
Всё-таки Богдан -кырӟась но Богдан-"смертной "(уг тодӥськы кызьы мукет сямен шуыны:-) ) чылкак пӧртэмесь...

Толло киное ветлэммес тодэ ваисько. "Хоббитэ". Ваньмы ӵошен. Али модно шуыны Чудья промо. Мон но озьы шуом ни-а мар-а. Шулдыр киное ветлыны ӵошен, эшъёсын Чудья промоен.

Кино бере нискыламзы потӥз. Нискыланъёс дасесь ӧвӧл на. Котыраз йӧ комокъёс. Мон ӧй дӥсьты тубыны ик. "Одно ик шуккисько,"-малпай ас поннам. Кыкетӥ яке куинетӥ классын дыръям нискылай вал куасэн ӝужыт гурезь йылӥсь... Али но тодӥсько на кыӵе лыз-лыз луиз вал берпалы писпу борды шуккиськем бере.

Учкыса сылӥсько чеберъям кыз шоры. Арысь аре одӥг кадь. Тунсыко но ӧвӧл. "Милям Сьӧлтаын,-шуэ Инна,- вокщё кыӵе ке странной кыз сылэ. Ӝыныез пуштрес, ӝыныез шерык-турык. Пуштрес палыз гинэ чеберъямын".
"Милям,-шуисько,- Алнашын мусорной кыз сылэ. Чеберъяло мар ке быдӟа шудонъёсын, кудъёсыз лэсьтэмын коробкаослэсь. Кыдёкысен жаген ошылэмын кадь ик адӟиське".

... Нош Чудьяос тубизы нискыланэ(мыным котьку сыӵе дыръя тодэ лыктэ мультик пичи обезьянъёс   сярысь:-) ). Шуккылӥськизы. Ӧз бӧрдэ:-) Туннэ Иннаелэсь адӟи мар ке быдӟа синяксэ макесысьтыз. "Уг ик жаля,-шуисько,-ачид винамат. Мон верай вал тыныд."

Киноысь потэммы бере Богдан шуэ:"Калашников кулэм".
... Жаль потэ. Сыӵе бадӟым адямиос медаз кулылэ кадь йӧтэ.
Бикузин шуэ:"Pussy Riot-ъёсты лэзиллям".
"Зато асьмеос ваньмы ӵошен киное ветлӥм".
Богдан:"Эпической нунал туннэ".

22 дек. 2013 г.

Кузьым

Кык нунал дорын. Ӧжыт. Кӧты уг тыр. Мӧзмон будэмъя золгес но золгес луэ.
Вазь ӵукна бертӥ. Ильяе султэм ини. Пырыса ӧй вутты бызьыса азям потӥз, чеберъям кыз возьматыны китӥм кутыса нуэ. Мама пыремме кылыса пудо сюдыса пыриз, тубаттӥ шаплы тубе комнатае. Сюлэм ик шымырске. Яратӥсько. Котыртӥзы. Возьмало салам:-)  Илья туж шумпотӥз фломастеръёслы. Кулыса быре соослы. Быдэс нунал суредаськыны,  гожъяськыны дась. Кызьы мама шуэ - писарчук.
Илья огпол ӵукна султыса, пе, шуэ мамалы:"А мыным Инмар мультикъёс возьматӥз". Мама:"Мар сярысь?" Илья:"Машинаос сярысь". Со уг ке вала куддыръя валэктон сётыны луэм арбериослы,  Инмар вылэ куштэ. Паймисько солы.
Ӵужай дорысен мар ке уксётӥрлык (монисто) сярысь вераськыны кутским. Мон ноку ӧй юалля вал, вань-а ӧвӧл-а солэн соиз. Ма уг нуллы,  соин кожасько вал ӧвӧл шуса. Ӵужайлэн вылэм. Вуж, пересь ӵужалэн. Потӥз чуланэ. Мон чидатэк возьмасько пыртэмзэ.. Таӵе дуно кузьым ноку ӧз кузьмаллялэ кадь на. Кыӵе со... Кыл но уг шедьтӥськы вераны... Жаляса верано, туж алама луэмын ини. Выльдытоно луоз.
Уксётӥрлык табере вань, кулэ на удмурт дэрем. Собере эктыны но кырӟаны дышетсконо. Возьыт ато марке...

21 дек. 2013 г.

Клетчатой флэшмоб

Толон валлян ветлӥмы "Пӧсятэм" патие. Дырызлэсь вазь вуимы. Пукиськом,  учкиськом кинъёс лыкто. Паймымон кадь. Мар ке мында Алнаш палъёс. Эшъёсы туннэ нуо патиез. Вашкала кырӟанъёс кырӟалозы, эктозы,  шудонъёс возьматозы. Возьмаськом. Туж тросэз лыктӥллям клетчатой дӥсен. Клетчатой рубашкаос, рубашкаос, дэремъёс. 30 штука чотай.  Собере сураськи. Горд клетка,  лыз, вож.. Будто вераськыса лыктӥллям.

Эшъёсы потӥзы сцена вылэ. Марайко кубызэн. Ваньзы уэтыны кутскизы да нуууу, мар та... шуса. Чик но толерантноесь ӧвӧл. Шӧдске, кубызлы дышемын ӧвӧл. Нош арганэн шудыны кутскем бере ваньзы эктыны кутскизы. Виразы пыӵамын кадь арган куара. Пыдъёссы асьсэ понна эктыны кутско кадь. Туж мыло-кыдо шудонэн шудӥзы. Куке но быдэсак арганэн ортчытоно. Уз чидалэ, дыр.

Фотое пуктылыса ветлонъям кин ке тыбырам туж юн шуккиз, ныл вал, шӧдске. Мынонъям донгыса лэзиськем-а мар-а. Йырме ӧй берыкты, туж зол вӧсь ке но луиз. Берытскыса ассэ шуккы вал...Вӧсьгес карысал, дыр. Кийы секыт.

Ярам, вазьгес бертӥ. Отын мясорубка кыӵе ке вылэм кадь воргорон сьӧросын. Куке улляса лэзёзы ини клубысь удмуртъёсты. Асьсэзыс адями кадь возьыны уг быгато. Шузимозязы юо.

17 дек. 2013 г.

вауууу, оуууу, ууух, оооохх, еееееааа!!!

18:00. Бикузин шуэ: "Ойдолэ, ойдолэ мон тӥледлы туж курутой инты возьмато".
 "Енисей". Забегаловка кыӵе ке. Ми 7 кузя отчы пыримы. Син азяды пуктэ: пуко пиосмуртъёс юыса ужзы бере и ми отын ӟабыльтӥськом удмурт сяин. Со забегаловкаын вань туж курутой аппарат, кудаз куштӥськод уксё и быръиськод кырӟан. Туууууж бадӟым быръёнэз. Чынзэ. Удмурт кырӟанъёс но. Бырйыкузы зӥбизы случайно кыӵе ке удмурт попсовой кырӟанэз. И вань воргоронъёс ми шоры паймыса учкыны кутскизы. Кырӟан мар ке быдӟа куараен. Ми асьмес куалектӥм. Шыпытак, пырсэкъяса кофе 3 в 1 юиськом перепечен (туж бадӟым выборез, кыстыбей но. Зэмзэ вераса ке, "Перепечкинлэсь" ческытгес татын сӥлен перепечсы). 3 удмурт кырӟан кылзыса вырӟим Сайлентъёсыз кылзынаы.

Пукиськом, возьмаськом ку занавес усьтӥськоз. Зал трос адямиез.

Усьтӥськиз. Ымен ӵош. Сыӵе лаконично сцена вылын адӟисько 5 удмурт кизилиос но оркестр Сайлентъёсын...

Кутскизы кырӟаны. Ӟазег ку луыса кошкисько кадь кылыса. Акыльтэм кырӟанъёс выль шӧмо луизы. Мылкыдэз кылъёсын гожтыса уг луы валэктыны. Только куддыръя, малы ке, кырӟасьлэн куараез "ворса" вал оркестрлэсь шудэмзэ.

Шумпотӥсько сыӵе кырӟась вань шуса. Чебер, кужмо куараен. Ручкина - зэмос удмурт кизили. Шумпотӥсько Алнаш палъёсысь шуса. Туж органично эктэ гуръёсызъя (туж мусо адӟиське вал, ку со дирижёр вӧзын эктэ, нош соизлэн выремез тожо эктэмлы кельше вал:). Туннэ особенно. Света бурдъяськемын. Залэн вераське, серекъя, шумпотэ. Мусо, чебер, мунё кадь.

Ярам, асьмелэн вань таӵе группамы. Кудӥз шоры учкыса шуиськод, что удмуртъёс вамышто "в ногу со временем". Тросгес сыӵеос мед луысалзы.
SWG-лы сӥзисько азинскон но выль кырӟанъёс.

P.S. Галихановзы сярысь чылкак вунэтӥзы вераны. Нош со пукиз "веньёс вылын" кадь, чуть ли интыысьтыз уг султы. Йӧтэ, потоз сцена вылэ но гитараез кутыса шудыны кутскоз.

Ӟучъёс трос вал. Шумпотӥсько.

Вераськонъёс:" Ой, давайте ум вераське удмуртлык сярысь. Акыльтӥз ни. Улэм потэ гань-гань".



Неизбежной ӟучомон

Чильпаськыса пукисько. Кыти ке но малпаськонъёсыным валасько, что кутсконо ни вал, дыр, зачёт сётонлы дасяськыны. Мыл уг пот . Пукисько. Чильпаськисько. Лыдӟисько ас поннам кӧня син бичасько веньёсам. Раз , два ,три .. Так. Дугды ай. Тон, Сергеева, шузи уд кылиськы ни а? Ку тон ас поннад ӟуч сяин чотаськыны кутскид? Тыныд ведь секыт потэ вал ӟуч сямен? Мар та, мар та? Паймоно кадь. Озьы аслым ачим  шуэм берам кутски удмурт сямен чотаны.

Туннэ ачим валатэк верасько:" Вить баллы ньыльдон пять пол пресс лэсьтоно..." Серекъяны кутскиз эше. Пайми нырысь. Собере вераз.

Неизбежной ӟучомон кыӵе ке. Бессознательной.

Нош куддыръя одногрупникъёсыным кутскисько удмурт сямен вераськыны. Соос мон шоры шузи вылэ кадь учко. А мон сылӥсько кӧня ке дыр валатэк, малы соос монэ уг валало. "Аааа, -шуисько, -пардоньте, мон вунэтӥ, что тӥ ӟучъёс". (и кин озьы умзэ усьтэ..одӥг удмурт 16 адями пӧлын. Ма мар. Море по колено шуо кадь:-) )
Серемзы потэ кызьы мон вераськисько, ку гужем ял карем бере вуисько. Быдэс гужемзэ ӟуч сямен ке ӧд вераськы, серекъялод но бӧрдод но, дыр. Чебер предложение ӟуч сямен кылдытыны секыт луэ.

Мда. Ӟуч филолог называеЦа

15 дек. 2013 г.

Ыжыш..

Пукисько троллейбусын. Пӧсь, зын. Мар ке кузьда пробка. Joy Division шудэ пельёсам. Таӵе дыръёсы яратыны кутскиськод бер тулысэз. Ку адямиез троллейбусъёсын ӧжыт. Ку ваньзы дӥсяськемын капчи дӥсен. Уг яратӥськы толэз. Трос дӥсяськонэз..

Хотя.. Кинлы мар. Туала пиос но нылъёс олокызьы но дӥсясько. Модной кроссовкиосынызы лымы вылтӥ ветло, штани улъёссы пужаллямын, гольык, весчи носкиен пыдъёссы мичиськемын. Кынмисько кадь шоразы учкыса. Чебер мед адӟиськоз,  туала модая.  Эке ке.. Со пиос сюбег штаниосынызы.. Нылпи ведь ваёно луоз ай. Али уг учко тазалыксы шоры, кынтаськыса ветло, нош пересьмем беразы ваньмыз шуккоз...

Мынам песяй шуэ:"Пинал дыръя уд малпаськиськы пересьмон сярысь, уд малпаськиськы висёнъёс потозы шуса. Уд чакласькиськы". Котьку нургетэ часталы ке ураме потӥсько шуныт дӥсяськытэк.

Малы ке шуныт дӥсьёс малпаллям ук. Нуллэ. Гужем дӥсез дыраз дӥсяно.

13 дек. 2013 г.

Пичи - шузи. Али но пӧртэм ӧвӧл.

Туннэ мар ке одногруппникъёсынымы тодэ вайылӥмы пичи дырмес (ми яратӥськом куддыръя озьы вераськыны пока дышетӥсь уг лыкты). Огез вера: "Мон пичи дыръям креслолэсь подлокотникъёссэ пуртэн ӵабъяй. Кыӵе ке программаын дышетӥзы мебелез вужмытыны. Ну и мон вужмытӥ. Кыӵе йӧтӥз уг мыным! Самой бадӟым изъянтонэ вал кадь со." Пфф, шуи мон ас поннам. Ма мар со? Ми пичи дыръямы выныным мар но ум дауртӥське вал.

Огпол ӵужаез помидортэк кельтӥм. Котькуд тулыс со дораз ящикъёсы мерттэ помидоръёс, собере гужем ураме поттэ (ну, ваньды озьы кариськоды, дыр). Так вот. Ми куное лыктӥм пичи вынэным (милям кусыпмы 4 ар). Со кутӥз кайчи но вандылӥз вань помидоръёсты. Мон курдай милемлы тыш йӧтоз шуса но со вандылэм помидоръёсты обратно бышкай. Чалякгес кошким. Мон уг тодӥськы мар вал ӵужаен ку со адӟиз ваньзэ...

Огполаз, уг тодӥськы кыӵе шузи кутэмен, эшъёсынымы пыримы бакчае. Вазь тулыс, сюй кема ӧвӧл на потӥз лымы улысь. Конечно ми отчы выйылӥмы. Сапег лякиське, вырӟыны уг луы. Сылӥськом бакча шорын, мар карыны паймыса, ӝожомыса каллен-каллен. Ярам кинке адӟиз но собере мамаосмы потыса ки вылазы поттӥзы милемыз отысь.

Пичи выны изьыса кылиз, нош ми мамаен часта мыном шуим магазинэ. Кельтӥз укно дуре ведра котэм нянен шундыя чалякгес мед ӝутӥськоз шуса. Бертӥм. Копак диван но, укно но зырамын котэм нянен. Ужам. Али но вуж диванлэн висъёсаз ыль нянь бервылъёс адӟисько на.

..Пичи гинэ шур бызе гурт вӧзтӥмы. Малая Уса нимаське. Кырсь мар ке кадь. Ми отын жомбылляськиськом вал. Нуналаз дас пол но вуиськом вал кадь. Огполаз (тоже незнай кыӵе шузи кутэмен) пыримы дӥськутэн. Просто тэтчам вуэ дӥсен но пыдкутчанэн. Толоназ басьтӥзы вал мыным сандалиос. Чебересь, бирюзовоесь тодӥсько на.. Ышиз палыз, ву кузя кошкиз-а мар-а. Незнай. Коня бӧрдыса утчай, доре бертыны курдаса. Уксё азьло колхозын шер тыро вал, ӵем выль дӥсь уг йӧты вал. Тодӥсько уксё ӧжыт шуса. Так и ӧм шедьтэ сандалиме.

Пегӟыса спичкаен но шудӥм вал шур дурын. Ярам нокин ӧз тоды. Со туж кӧшкемыт вал мама или атай тодӥз ке. "Чиньыостэ сутыло,- шуэ вал атай,- спичкаен шудӥд ке".
"Ферма котыртӥ эн ветлы, сӥте выёд," -вера вал мама. Огполаз выль эшеным мынӥмы ферма пала (городысь лыктӥз, мон 1 классэ мынӥсь адями вал, нош со 9. Эшъёсыз ӧй вал на, соин ӵем монэн вераське вал). "Адӟем, пе, потэ кытын мамаед ужа". Вуим. Малы ке ми вуим со интые, кытчы быдэс фермаысь сӥть куштӥське. Гужем шундыя со адӟиське кынмам кадь. Вылыз куасьмемын, будто туж бадӟым вӧльыт инты, кытын номыр но уг буды. "Мар та",- юа. "Сӥть",-шуисько. Ӧз оскы, сомында, пе, не может луыны. Лёгиськиз но ӝыны пыдэныз выйиз. "Вот шузи",- малпай мон. Со дырысен валай, что мама котьку чынзэ вера, что солэсь верамзэ пеле пононо.

Трос на. Оломар но.






"Одӥг гуртлэн пумаз кизьнод, нош мукетаз сурттэм шуозы ини". (с)

Адямиос сыӵе тунсыкоесь вщё-таки:) Кыл Киевозь вуттэ шуо кадь.  Мар но выльзэ ачим сярысь уг тодӥськы котькуд нунал. Отын но вылӥськем, соиныз но ветлӥськем, таиныз но вераськиськем... Осто, шуод ини. Серекъялод-а, бӧрдод-а. Ма, номыр уг вера.

Валасько, адямилы кулэ сиён. Со котькуд нунал сиськыны кулэ вераськонъёсын. Алама вераськонъёсын ӵемгес, кудӥз адямиез кырсьмытэ, яке сереме уськытэ. Кызьы ӵужай шуэ:"Одӥг гуртлэн пумаз кизьнод, нош мукетаз сурттэм шуозы ини". Гурт гуртэн. Город городэн. Хотя ог-огзылэсь номырин уг висъясько.  Котьку со верамзэ тодам ваисько но сюлэмын каньыл луэ котькыӵе верамъёс бере.

ОБЖ-ен дышетӥсьмы Юрий Трофимович шуэ вал:"Если адями тӥ шоры черекъя ке дӥльдызэ ик пазяса, син азяды пуктэ, солэн йыраз трёхлитровой банка иззяськоды шуса. Обязательно серемды потоз".

Словесной понос туннэ мынам кыӵе ке.

12 дек. 2013 г.

Фу, кыӵе тӥ пафосноесь...

Вот, шуо, адями паллян пыдысен султэм туннэ. Мон туннэ йырчукинь валесысь тэтчиськем-а мар-а... Сӥть кадь нунал. Ваньмыз киысь усе, котькытчы канжаськисько.  Ныр тыремын, уг шока, ымтӥ шокасько. Больницае ветлыса, ӝожомыса бертӥ малы сыӵе адямиос лекесь шуса. Мон со эмъясьёсыз ноку уг валаськы вал. Котьку черекъян вис шедьтозы тон вылэ. Неужто мынам но эмъясьлы дышетскись эшъёсы луозы сыӵеесь ик?

Быдэс нуналзэ висьыса ки ветлэ. Толон выль усьтӥськоно библиотекаын утялтӥським. Ми сяна кинке отын утялтӥське на меда? Ме, пе, тыныд шпатель, выж вылысь усьылэм краскаез конгыръя. Ай бервылме сыӵе учко, что мыным потӥз, мон кошкем бере, тӧдьы кышетэн бервылме маялтыса эскерозы на. Ужаммы бере, комендант тау шуэм интые милемлы чуть ли кыдёке сюрес ӧз возьматы. Тӥ, пе, ужаны уд быгатӥське (ма ми ӧм но куриське особо). Картъёстылы кышноен не повезет, пе. Пфф... Кинлы ке, видать, кышноен не повезло ини.

Параосын пукыны уг чидаськы. Вӧтэсэ пырисько. Ну мар. Иворъёс. Ваньды календарь (кызьы песяй шуэ "численник") лэсьтӥзы ни-а? Шӧдӥське ар быре ини. Удмуртъёс асьсэлы "забава" шедьтӥллям. Кин кинэ "переплюнет", пе. Аха.

Дарали кытчы сюрем "Гожтӥське удмурт газетлы!" лозунгеныз чуркнаське.

 Ну, и, конечно, матэктӥсь концерт. Вокщё мактаса быдтӥзы ини. Отын фото, татын видео интервьюен. Котькытын. Вань ивор лентаын. Ма только малы ке, тросгес ӟуч сямен. Ма тузи луоз ини концерт, раз кырӟасез со понна гинэ Удмурт шаерамы кылем бере. Син гинэ медаз усьы ини.

Удмуртъёслэн висён кутскем (не мынам кадь (зырым, извиняйте, кыскаса ветлӥсько)). Пафос нимаське.

Одӥг гинэ шумпотон. Вузаськонниын трос гранат вузаське. Дунтэм.

10 дек. 2013 г.

Кылдымтэ географичка

Мон туж яратӥсько географиез. Туж умой дышетӥсьмы вал школаын. 8-9 классын малпасько вал географической факультетэ пырыны. Но. Но 10 классын дышетӥсьмы воштӥськиз. Егит. Йӧназ номыре уг тоды. Мон солэсь тросгес тодӥсько вал, дыр. Да и образованиез мукетгес. Мынам мылкыд быриз мар ке со бере. Даже "Географ глобус пропил " книгаез но лыдӟыса мылкыд ӧз ни ӝутскы. Коть туж кельшиз книга.

Географиез яратэменым, дыр , филолог но луыса курсовое топонимъёс сярысь. 
Мон али но туж яратӥсько учкылыны картаосты, пӧртэм путешествиос сярысь программаосты.

Котьку но учкисько вал, что Удмурт шаермы "сюлэм" пушкын. Кык шуръёс сюлэм кадь. Тани туннэ учки Яна Городиловалэсь специальной репортажзэ. Отын вераськизы ӧжытак со ласянь. Только соос шуо Удмуртия, пе, котрес пушкын. Будто бы шаермы кельше островлы. Со ласянь калыкмылэн сямъёсыз но аспӧртэмлыкоесь. Пайми ӧжытак. Да ну, шуизы мыным, со тема вуж ини... Но мыным со сыӵе тунсыко потӥз.

Георгафия туж тунсыко. Самой тунсыко мыным потэ...

1 дек. 2013 г.

Сектант

Толон бертӥ вазь ӵукна доре. Жади мар ке кык арня солань-талань ветлыса.
Ӝытпал эшшо ӵужмуртъёсы ӧтизы на конькиен нискыланы Менделеевске.
Куинетӥ классэ ветлӥсь пиенызы верасько ӟуч сямен. Ас поннам малпасько:"Юано-а ӧвӧл-а малы удмурт сямен уд вераськиське шуса". Шып улӥсько. Ярам.
Гуртын, мыным потэ, уг малпасько удмурт кыл быре шуса. Уло асьсэ улонэнызы. Верасько кызьы потэ. Милямаз гуртын точно уг малпасько, дыр. Ваньзы удмурт сямен верасько. Ӟуч сямен вераськыны кутскид ке, шузи шоры кадь учкозы.
Вераме потэ кадь но ӵужмуртлы, уг вераськы. Кыӵе ке религияез верасько кадь. Кыӵе ке сектант кадь. Ветло уг ай адямиос внушать карыса кыӵе ке осконэз. Вот озьы ик.

29 нояб. 2013 г.

Не ӟуч кар

Туннэ ӵукна вуим Москвае. Мыным та город уг кельшы малы ке. Одӥг пол но ӧй вал ке но татын.
Вуимы вокзалэ. Казанскоисьтыз кошконо. Милям вань 5 часмы. "Ойдо, - шуисько,- хоть Красной площадез учком-а мар-а".
Метрое пуксим. Сыӵе арсыз.. Сомында адямиез, вуж метро, пеймыт, кырсь, адямиос дыртто, донгыса лэзё. Петыркарын дас поллы умойгес: адямиез нокытчы уг дыртты,  чылкыт метро, югыт...
Метроысь потыкумы Поздейкинлэн синыз усиз ялон шоры. Бурановской песяйёс, пе, Кремльын кырӟалозы. Осто, шуса кошким.
Вуимы. Син нырысь ик усиз, конечно, борддорез шоры. Ӝужыт. Дышемын кадь учкыны киноосысь, газетъёсысь. Кыӵе ке дас пол лёгам тема. Нош ачид, ас синмыныд учкиськод ке, сюлэм шурдэ.
Собере площадяз кожим. Син нырысь ик усиз баааааадӟым сандык шоры:-) Одӥг пал сэрегзэ кесяны кутско ини вал. И кызьы сое отчы пуктӥллям? Со же туж, зэм но, мар ке быдӟа. Неужто пуктыкузы нокин ӧз дугдыты? Трос ик кинке кинлы ке уксё куштӥз та понна, наверно. Туж курутой реклама. Оломаре но адӟод вылэм..
Мукет палаз "тол городок" пукто, конькиен нискылан инты лэсьто. Котыр ужасьёс. Трос бадӟым машинаос. Кыӵе ке хаос.  Кот, противной лымы усе, тӧло. Кузьыли кар. Котыр адӟисько совсем не ӟуч ымныро адямиосты.
И кыӵе шузиез мынэ Москвае улыны, а тем более уж утчаны? Ул шыпытак ас дорад но ужа. Мар соослэн ужамзы? Лымы тазато. Трос басьто ини, дыр. Улон интызэс малпам ик уг поты кадь. Огез тӥни, изе вал урамын. Пуны кадь.
Вокзалын но. Дунтэм противной одеколон зынъёс сураськемын эгыр, поезд, пӧсям зынъёсын. Кыӵе но ымныр ӧвӧл.. Тросэз нош ик ӟучтэм. Бадӟым сумкаосын. И ведь лыкты та кеме уж утчаны. Милям поездмы мынэ Нюренгри каре. Якутиысь -а мар-а кар. 5 нунал, пе, мынэ. Тросэз Москваысь ужаса берто. Мыным йӧтэ, азьтэм адямиос гинэ мыно Москвае уж утчаны. Мылыд ке потӥз, дорад но шедьтод мар карыны. Как раз лыдӟисько "Русский репортёрез". Гожъямын, кызьы куашкась гуртаз но воргорон уксё поттыны быгатэ.
Трос армиысь бертӥсьёс. Пиналэсь на. Малпаськод, нош соос мар карозы бертыса? Тожо уж ӧвӧл шуозы. Мынам однокласснике кошкиз армия бере Сахалинэ ужаны. Уж ӧвӧл шуса. Ярам, не Москвае.
Сыӵе ик Москва кылёз малпанам. Зынмем, кырсь, не ӟуч кар.


Тютюка

Туннэ бертон сюресэ потӥсько.
Дырмес ортчытӥськом Светалэн ужаз. Киям книга кутӥ. М.Г. Атаманов "Удмурт нимбугор". Кыӵе но нимъёс ӧвӧл. Серем но потэ кадь. Шуом, Орех, Тютюка, Чибинь.. Мда.. Оломар но. Мар шуыса сыӵе ним тырод? Кыӵе ке арберилы кадь. Син медаз усьы шуса? Тросэз тюрк. пометаен, значениоссы оломар кадесь. Чебер кылӥське шуса тыро вал, дыр. Кыллэсь пуштроссэ тодытэк. Света шуэ:"Азьло сомында нылпиоссы вал, что уг ик малпасько вал, дыр, кыӵе нимлэн пуштросэз". Сюлэмшугъяське кызьы, пе, кыкетӥезлы ним пононо. "Нырысетӥезлы туж удачно ним шедьтӥм. Юбер удмурт но француз кылъёсын вань".

Удмурт нимъёслы гурт адямиос дышемын. Азьло выжы нимъёссыя верасько. Коньы Люба, Куака Петя,  Ӟемай,  Аськей, Гондыр, Ӝакы... Бускельёсмы пичи пизылы Марк ним понӥллям. "О,-шуисько,-непривычно мар ке.." Песяй:"Вашкала ним понӥллям".
Куддыръя паймиськод кадь, кызьы ним адямиез быгатэ возьматыны. Мынам атай Юрий - земледелец, пе. Пинал дырысеныз тракторен ужа ини. Гыре, ю нянь кизе.
Туж тунсыко потэ учкылыны нимъёслэсь пуштросъёссэз. Ним адями сярысь троссэ быгатэ вераны.

27 нояб. 2013 г.

Мынам

Туннэ поръямы Хельсинкитӥ.
Нырысь пыраме Кастрен нимо обществое. Уг тодӥськы кызьы шуыны.:-) Мар ке вылез луоз. Возьмалэ:-) Мыным потэ оломар но вылез луоз, м.к.ш. Поздейкин потаз Удмуртия сьӧры. Солэн сомында малпанъёсыз.. Ну, ярам, уг ни ваньзэ вера.
Эшшо пырам на университетысь столовое. Былин. Мынам со бере уг ни пот пыраме асьме университет столовое. Мар сиемед потэ - сииськод и сомында, кудмында потэ. Ваньмыз понна одӥг дун. Студентъёслы 2 евро.  асьсэос ик утялто тусьты-пуньызэс. Соос, пе, котькуд ар тыро 60-а мар-а евро членской взнос. Собере олокыӵе но льготаос. Умой. Туж.

Толон мыным потӥз, что Хельсинки паськатӥсь,  сюбег кар. Туннэ мон валай - со сыӵе чик но ӧвӧл. Туннэ ветлӥм набережнойтӥ. Кыӵе татын чебер но котыр эрик, марке мында омыр но ву. Шокан пась ик быре.  Таллинлэсь но зол кельшиз мыным туннэ Хельсинки. Зарезь шоры дугдылытэк учконо кадь. Син уг жадьы.
Татын кыӵе ке адямиосыз мукет. Мукет дӥсясько, мукет асьсэды возё. Коркаоссы но мукет. Трос омырез, бадӟым пространствоез. Синмаськымон.
Тазьы ветлыса эшшо но эшшо мылкыд куашка ас шаер понна.

Хельсинкиын

Вуимы. Сюбег урамъёс. Паськасько кадь. Финляндия кельше йӧнтэм дышетӥсьлы. Ма, озьы ик малпасько вал. Мон дыши эстон но фин кылэз "отличать". Финъёс "йо"шуо, нош эстонъёс "йа" :-) Эстон кыл мусогес потӥз. Кырӟаса кадь соос верасько.

Мынӥмы Света Едыгаровалэн ужаз. Филологъёслэн карзы:-) Кузьмаз француз-удмурт кылбугор.
Света оломар но вераське:-)
Адӟи тушо пиосмуртъёсыз. Со, пе, студентъёс:
"Финъёс кузь йырсиё, кузь тушо. Малыке шуоно, татын дуно ӵышкиськыны. Мон вет9лӥсько Эстоние ӵышкиськыны. Симо кытысь ке Саранскысь ӵышкиськыса вуэ." Секыт финъёслэн улонзы:-)  Юыны но Таллинэ ветло. Алкотуризм:-)

Сиськыку опять потӥз блог сярысь вераськон. Мон блог гожъяны кутскыкум уг малпаськы вал, что со сыӵе "тодмо" луоз. Что со понна сыӵе вераськонъёс потозы. 

26 нояб. 2013 г.

Хельсинкие

Пукисько паромын.  4 этажъем вал кадь. Вож. Чебер. Таллинысь Хельсинкие. Нырысьсэ собыдӟа вуэ потӥсько. Котыр зарезь.

Толон нырысьсэ адӟи зарезез. Сыӵе со бадӟым, сайкыт, кужмо, сьӧраз кыскись.

Нади возьматӥз вуж карез. Со ваньзэ-ваньзэ тодэ Таллин сярысь. Туж умой гид. Таӵеен ик аслым Европаез син азям пуктӥсько вал. Вуж, горд липето. Олокыӵе но мусо кафеосы пырамы. Малы Ижын сыӵеесь ик ӧвӧл мед-а?

24 этажъем гостиница йылэ тубаса учким Таллин шоры. Шокан пась ик быре кадь адӟыса кыӵе татын чебер.

24 нояб. 2013 г.

Таллин

Туннэ кошкимы Выруысь.

Быдэс сюрессэ Едыгарова Светаен вераськыса мынӥмы. Со вераз, кызьы французъёс будэто нылпиоссэс. Пичи дырысенызы соос, пе, сисько ини вилкаен но пуртэн (аха, милямъёс 18 аресазы гинэ дышо ай, яке вообще озьы уг сисько), гадь вылаз сиёнзэ уськытэ  ке - парсь, эшшо не дай бог маин ке мед наштаськоз - улон быроз. Туж недемократичной воспитанизы. Монъя - пичиос наштаськыса, мае ке сӧрылыса  улонэз тодо.

...Таллин пумитаз кудӟем финъёсын,  кудъёсыз пароме мыно вал (татчы, пе,  соос ӵем вуыло юыны. Таллинын дунтэмгес, пе, ваньмыз. Соин часта гинэ татчы вуо Хельсинкиысь. Серем потӥз мар ке. Тодэ ваи атайлэсь пичи дырзэ верамез сярысь. Анайёс, пе, ветло вал бигере октӥськыны. Отын, пе, товар но вал, дунтэм но вал. Мон, пе, сьӧразы весь калъяськисько вал. Одӥг пол дэрем сэрегме бадӟым из улэ паськатыса кельтӥзы, мон медам мыны шуса).
Пумитаз Муш Нади.  Мон сое фотоосысь адӟи ни вал. Первой малпанэ: властелин колецысь кыӵе ке персонажлы кельше. Мусо горд пештырес, бабылес йырси, ачиз лапег. Зэм но маиз ке мушлы но кельше:-)

Нуиз дораз. Ох! Точно хоббитлэн кадь корка улосэз:-)  Выжыкылын кадь, зэмзэ но:-) Ваньмыз пулэсь, гурен эстӥське, мар ке мында книгаос.

Сиськыса кошкимы уй Таллинэз адӟыны.
Нырысь пыримы "Валли"(нылкышно ним)  баре. Туж тодмо бар. Нади шуэ:"Одно юоно милли малликас. Ато тон сое ке ӧд юы значит Валлие ӧд но пыра". Мон ӧй но юа марлэсь со, кыӵе со. Адӟи горд мар ке. Йырын чилектэм кадь: точно перец. Юи. Ым пушкын ӝуа. Юасько. Нади мыняса шуэ:"Чили перецен". Вань на отын пересь вышибала. Таза. Корстен нимыз. Труба, пе, асьме сяин. Куке но трубочист луыса ужам (ма али но со уж вань на). Со вообще кыӵе ке сказочник. Оломар но вераса пуке. Амазонкаос, пе, куке но татчы вуылӥллям, соин татын матриархат.
Мыным вераз 6 кылэз тодӥсько шуса.
Собере вӧзам кыӵе ке пиосмурт лыктӥз. "Мон,-шуисько,-удмурт. Тонэ уг валаськы". "О, -шуэ,-угри -мугри". Сыӵе мусо йӧтӥз верамез. Соос, пе, озьы шуо финно-угръёсыз. Но асьсэзыс, эстонецъёсыз, озьы уг шуо. Собере потӥм ураме мукет баре потыны. Со пиосмурт сьӧрам бызьыса потӥз но мырдэм но кызьы ӟуч сямен вера:"Ты, я. Эстонцы, саамы,  удмурты и другие... мы ведь одна семья.." Собере юн ӟыгыртӥз. Поздейкинэн Надя серекъяса сыло.

Мынӥм Кики клубе. Ноку ӧй малпа вал, что экто 80-тӥ аръёслэн гуръёсыныз.

Суббота. Трос юэмъёс. Кудӟем Таллин. Урамъёсын уй улон кутскемын. Вуж урамъёсын. Тодэ лыктӥз гужем Кузонэ ветлэме. Вуж урамазы тожо ваньзы люкасько но отын уй улон кутске.

23 нояб. 2013 г.

Жуммем йыр

То ли быдэс нуналъёсын семинарын пукыса, то ли мар.. йыр каждой ӝыт висе. Быдэс нунал пукиськод но кылзиськод тодмотэм вераськемез. Ярам берыктӥсьёс вань. Алама, что мон удмуртэз но ӟучез гинэ тодӥсько. Мынам сыӵе вераськеме потэ кудъёсыныз но соосыныз, нош соос ӟучез уг валало. Эх, а валасько, что соослэн но вераськемзы потэ. Уг луы. Сыӵе беспомощность.
Мон вообще паймисько со адямиослы, кудъёсыз трос кылын вераськыны быгато. Мынам чиданэ уг тырмы дышетыны. Азьтэме ачим быдӟа. Дышетысал ке, мон али тодысал ини немец, француз но польской кылъёсты. Кыӵе ке неудачница. Со монэ куддыръя туж йырвисьытэ. Ачим асме неудачница карисько. Донгыс.
Мон синмаськыса учкисько соос шоры кин вераське олокыӵе но кылын.

Эшшо йыры берло дыре висьылэ, наверно, солэсь, что мон валасько- мыным уг тырмы духовной сиён берло дыре.


А эшшо висе со понна, что трос кулэтэм сярысь малпаськисько. 

Эшшо со понна, что эшъёсылэн вордӥськем нуналазы ветлэме ӧз луы. Ваньзы, вераськем кадь, вордӥськемын шуркынмонэ. Таня но, Инна но, Наташа но, Яна но. Ваньзэ проворонила кадь йӧтӥсько. И малы ке сыӵе дыръёсы асме виноватэ кельтӥсько.

А эшшо визьтэммымон мӧзмисько пичи Ильяелэсь.