Улмо. Яблок. Ческыт зын. Валалод.

Ветлӥм мамаен вазь ӵукна песяйлэн вуж юртаз. Мон куке та юрт сярысь гожъяй ни вал. Сояз аре, августэ ик. Вордӥськем юртэ. Куажга ини копак. Мылкыд ик быре шораз учкыса, кема кыллеме уг луы ни татын, нош азьло почти каждой нунал вуылӥсько вал. Вань, самой ӟеч малпанъёсы, пичи дыр малпанъёсы та юртэн, урамен герӟаськемын. Нош али урамез но шал-шал кылемын ини. Мама шуэ: "Азьло та самрй шулдыр урам вал, дыр. Нылпиос каждой коркан вал, нош али будӥзы но кошкылӥзы ини. Аслым но секыт ини та урамын кема дыр кылльыны, кошкем потэ." Пинал дырыз угось тожо та урамен герӟаськемын. Тожо вӧсь учкыны. Котьку пыре но садэ вералля кызьы бабаеным писпуос мерттыло вал, кудӥз кыӵе писпу ку мерттэмын, мар йырин мерттэмын. Шудо егит дыр. Пинал семья.

Малы ми ветлӥм? Улмо бичаны. Туэ туж трос улмо. Только пуд бордаз ик сисьме ини. Песяйлэн садаз улмопу трос. Кыкез корка азяз ик будэ. Мон вордӥськон азьын бабай мерттэм вылэм, али корка ӝужда будэмын ини. Антоновка огез.
Корка вӧзын ик будэ палэзьпу. Мон мамалы вераны кутски: "Вот азьло ныл ке вордӥське вылэм, мертто корка вӧзы палэзьпу, а если ке пи - льӧмпу". Мама: "Так ке ярась вал палэзь мерттыны, со шуо уте касамлэсь". Касам? Касало? Касаны? Мама, кытысь тон сыӵе кылъёсты тодӥськод? Мынам со туннэ слово дня вал кадь. Нырысьсэ кылӥ. Завидовать карем, пе, со. Мон пайми. Куддыръя оломар но кылод мамалэсь но, не только ӵужайлэсь.

Озьы вераськыса бичам но бертӥм, опять сюлэм висьыса. Ӵем ветлоно ӧвӧл, дыр, ини со ураме.