31 янв. 2018 г.

30.01

Мынам выльысен потэ пичи дырам. Ку ваньмыз тодмотэм но тунсыко вал. Ку матысь гуртъёс йото вал туж кыдёкын. Ку Чумолёе ветлиськомы вал цирк учкыны (ооо, кыче со событие вал! И не дай бог дорын уксё уг луы. Трагедия). Ку Кузёбай вал мурт но тодмотэм кыдёкысь гурт, йонтэм адямиосын (мынам сыче представление вал. Кузёбаёзь всего-то 3 иськем). Нош Сьод Ошмес - тодмотэм гурт йотэ вал. Шыпыт адямиосын. Кудъёссэ школа дырозь адзылэме ик ой вал кадь, пока куинь одноклассникъёсыным ой тодматскы. Чумолёосты котькуд нунал адзисько вал. Ньыль аресысен гуртмылэн Чумолёпалаз улыны кутскимы яратоно Улмосад урамысь выжыса (трагедия). Укноти учкисько ини вал, кызьы соос школае мыно, бадзымъёс - ужаны.

Мынам выльысен потэ тудвуости коласа ветлэм, тулыс зынэн быдэс гадь тыр шокаса, кылзыса, кызьы куакаос, куашетыса, интыясько каръёсазы. Нош шунды сыче но пось, курткаез но шапкаез куштэм потэ. Только не дай бог кин ке адзоз и мамалы вералоз. Тулыс - самой алдаськись вакыт. Мамалэн индылэмез. Господибожемой. Дыр ортчыса гинэ валаськод сое лэся. Потэ мырдэм шундыя куасьмем дэри вылти наконец-то колошаен ветлэм, а не акыльтэм резинка сапеген.

Потэ кезьыт сизьыл омырен шокам, картошка бичан зынэз шодэм но кезьыт, кот сюй зынэз, кудиз бугырске бакча гырем бере. Кылэм потэ шуныт пала лобзись тылобурдоослэсь куараоссэс чырс палэзь веръяса, пыд улысь усем куаръёслэсь зынзэс шодыса.

Мынам выльысен вуж школа палти эшъесын шудыса ветлэм потэ. Губияме, картошка пыжеме. Картошка пыжыны тулыс яратиськомы вал малы ке, не сизьыл. Али лымы улысь шундыен шунтэм вуж гуждор вылын пакиен шудыны. Милям поламы кык пиос сяна но ой вал. Пи мылесъёс кадесь ик, остоиньмаре, шудиськом вал.

Мынам потэ озьы ик. Ку ас гуртэ - со быдэс дунне. Дунне, кудизлэн бусы сьораз тодмотэм адямиос, тодмотэм интыос. Со тодмотэмъёстэк но улон ганяк вал. Соос кулэ но ой вал. Быдасак выемын эшъёс полы, семья пушкы.

Комментариев нет:

Отправить комментарий